៥សញ្ញា បញ្ជាក់ថាអ្នកជាមនុស្សសំខាន់ក្នុងជីវិតគេ
ស្នេហា៖ សម្រាប់មនុស្សប្រុសក្រៅពីម្តាយរបស់គេមនុស្សប្រុសមិនងាយចាត់ទុកមនុស្សស្រីណាម្នាក់សំខាន់ខ្លាំងក្នុងជីវិតគេឡើយលុះត្រាតែមនុស្សស្រីម្នាក់នោះ មានអ្វីពិសេសខ្លាំងដែលអាចឱ្យគេចាត់ទុកជាមនុស្សស្រីសំខាន់ខ្លាំងម្នាក់ បន្ទាប់ពីម្តាយរបស់គេ។
ដូច្នេះហើយមនុស្សស្រីគ្រប់រូបប្រសិនបើជាចង់ឱ្យខ្លួនឯងក្លាយជាមនុស្សសំខាន់ខ្លាំងម្នាក់ សម្រាប់មនុស្សប្រុសអ្នកត្រូវចេះរៀបចំខ្លួនឱ្យបានល្អហើយបើចង់ប្រាកដចិត្តថាមនុស្សដែលអ្នកស្រលាញ់រាល់ថ្ងៃនេះ គេទុកអ្នកសំខាន់ឬអត់អ្នកអាចសង្កេតមើលលើសញ្ញា ដូចដែលបានរៀបរាប់នៅខាងក្រោមនេះបាន។
៥សញ្ញាបញ្ជាក់ថាអ្នកជាមនុស្សសំខាន់ក្នុងជីវិតគេ៖
១.គោរពនិងឱ្យតម្លៃអ្នក
មនុស្សដែលគេស្រលាញ់និងចាត់ទុកអ្នកជាមនុស្សដ៏សំខាន់ម្នាក់នៅក្នុងជីវិតគេ គឺគេតែងតែមានការគោរពនិងឱ្យតម្លៃមកលើអ្នកជានិច្ច ដោយមិនមើលងាយ ឬធ្វើអ្វីលើសលួសដែលនាំឱ្យប៉ះពាល់ដល់សេចក្តីថ្លៃថ្នូររបស់អ្នកឡើយអញ្ចឹងហើយ អ្នកអាចសង្កេតមើលលើទង្វើរបស់គេបាន ថាគេបានបង្ហាញពីការគោរព និងឱ្យតម្លៃអ្នកដែរឬក៏អត់។
២. ដឹងគ្រប់យ៉ាងពីអ្នក
ពិតណាស់ មនុស្សប្រុសមិនងាយទុកអ្នកណាសំខាន់ខ្លាំងក្នុងជីវិតរបស់គេឡើយតែបើគេចាត់ទុកថាជាមនុស្សសំខាន់ម្នាក់នៅក្នុងជីវិតរបស់គេហើយនោះ គេនឹងដឹងគ្រប់យ៉ាងពីអ្នកថាអ្នកចូលចិត្តអ្វី ឬមិនចូលចិត្តអ្វី ដោយមិនចាំបាច់ឱ្យអ្នកទៅនិយាយប្រាប់គេដោយខ្លួនឯងនោះទេព្រោះការស្រលាញ់របស់គេ បានធ្វើឱ្យគេព្យាយាមយល់ពីអ្នកដោយខ្លួនឯង។
៣.នៅក្បែរអ្នកគ្រប់ពេលមានបញ្ហា
មនុស្សប្រុសដែលទុកអ្នកសំខាន់ក្នុងជីវិតគេ រាល់ពេលដែលអ្នកមានបញ្ហាម្តងៗ គេមិនត្រឹមតែមិនរត់ចោលអ្នកទេ តែគេនឹងយកបញ្ហារបស់អ្នកមកធ្វើជាបញ្ហារបស់គេ ហើយជួយដោះស្រាយបញ្ហាទាំងនោះជាមួយអ្នក បែបនេះហើយ អ្វីដែលអាចបង្ហាញឱ្យអ្នកបានឃើញថាគេទុកអ្នកសំខាន់ឬក៏អត់អ្នកអាចសង្កេតមើល នៅពេលដែលអ្នកជួបបញ្ហា។
៤. ស្រលាញ់ការពារអ្នក
សម្រាប់មនុស្សប្រុសបើគេទុកមនុស្សស្រីណាម្នាក់សំខាន់ក្នុងជីវិតគេហើយ គេមិនបណ្តោយឱ្យអ្នកណាម្នាក់មកប៉ះពាល់ ឬធ្វើបាបមនុស្សស្រីដែលគេស្រលាញ់ឡើយគេនឹងចេញមុខការពារមនុស្សស្រីដែលគេស្រលាញ់ជានិច្ច ដូច្នេះហើយភាពសំខាន់របស់គេចំពោះអ្នក នឹងលេចចេញមកនៅពេលដែលអ្នកត្រូវអ្នកដទៃធ្វើបាបឬជិះជាន់អ្នក។
៥. ផ្តល់អ្វីដែលល្អបំផុតឱ្យអ្នក
ជាការពិតនៅពេលដែលមនុស្សប្រុសចាត់ទុកអ្នក ជាមនុស្សស្រីដ៏សំខាន់ម្នាក់ អ្វីដែលគេអាចធ្វើបានដើម្បីមនុស្សស្រីដែលគេស្រលាញ់គឺគេនឹងផ្តល់អ្វីដែលល្អបំផុតឱ្យមនុស្សស្រី ជាពិសេសសេចក្តីសុខហើយគេក៏មិនធ្វើឱ្យមនុស្សស្រីដែលគេស្រលាញ់ ត្រូវរងទឹកភ្នែកដោយសារតែគេដែរ តែគេនឹងធ្វើឱ្យមនុស្សស្រីដែលគេចាត់ទុកជាមនុស្សស្រីសំខាន់ ទទួលបានសុភមង្គលបំផុត៕