ប្រភេទមនុស្សប្រុស ដែលមនុស្សស្រីចង់ផ្ញើជីវិតលើ

យល់ដឹង៖ មនុស្សប្រុសមិនមែនឱ្យតែមានមុខមាត់ស្រស់សង្ហា និងជាអ្នកមាន​គឺអាចយកមនុស្សស្រីណា មកធ្វើជាប្រពន្ធបាននោះទេ ព្រោះមនុស្សស្រី មិនមើលទៅលើតែអ្វីតែមនុស្សប្រុសមាននៅពីខាងក្រៅទេគឺតែងសម្លឹងមើលទៅលើអ្វីផ្សេងទៀត។

ហេតុនេះហើយមនុស្សប្រុសប្រសិនជាចង់ឱ្យខ្លួនឯងក្លាយជាមនុស្សប្រុសម្នាក់ដែលមនុស្សស្រីណា ក៏គេចង់ផ្ញើជីវិតនិងវាសនាលើ មនុស្សប្រុសត្រូវធ្វើខ្លួនឱ្យស្ថិតនៅក្នុងប្រភេទមនុស្សប្រុស ដូចដែលបានរៀបរាប់នៅខាងក្រោមនេះទើបមនុស្សស្រីគេចង់ផ្ញើជីវិតលើអ្នក។

ប្រភេទមនុស្សប្រុសដែលមនុស្សស្រីចង់ផ្ញើជីវិតលើ៖

១. មនុស្សប្រុសដែលមានការប្រឹងប្រែង

ទោះគ្មានរូបរាងសង្ហាឬមិនមែនជាអ្នកមានទ្រព្យស្តុកស្តម្ភក៏ដោយ មនុស្សប្រុសឱ្យតែជាមនុស្សមានការប្រឹងប្រែងតស៊ូព្យាយាមក្នុងជីវិត មនុស្សស្រីណាក៏ព្រមផ្ញើជីវិតរបស់គេលើអ្នកដែរ ព្រោះមនុស្សស្រីជឿថា​ មនុស្សប្រុសបែបនេះនឹងក្លាយជាមេគ្រួសារដ៏ល្អម្នាក់នៅថ្ងៃអនាគត ដូច្នេះហើយ ទើបគេជឿជាក់និងហ៊ានផ្ញើវាសនាលើអ្នក។

២.មនុស្សប្រុសដែលមានទំនួលខុសត្រូវ

មនុស្សប្រុសដែលមានទំនួលខុសត្រូវទៅលើអ្វីដែលខ្លួនធ្វើគឺជាមនុស្សប្រុសដែលគួរឱ្យទុកចិត្តបាន ព្រោះវាបង្ហាញពីភាពជាកូនប្រុស ដែលហ៊ានធ្វើគឺហ៊ានទទួល មិនមែនចេះតែនិយាយចោល ហើយមិនដែលធ្វើបាននោះទេ គឺគ្មានមនុស្សស្រីណាម្នាក់ គេហ៊ានផ្ញើជីវិតលើឡើយលុះត្រាតែមនុស្សប្រុសម្នាក់នោះ ជាមនុស្សដែលមានទំនួលខុសត្រូវខ្ពស់។

៣.មនុស្សប្រុសដែលចេះការពារ

មនុស្សប្រុស បើមិនចេះការពារមនុស្សស្រីដែលខ្លួនស្រលាញ់គឺគ្មានមនុស្សស្រីណាគេចង់ផ្ញើជីវិត និងអនាគតរបស់គេ ទៅឱ្យមនុស្សប្រុសអសម្ថភាពដូចជាអ្នកនោះទេព្រោះថាគេមិនជឿ និងទុកចិត្តទៅលើអ្នក ថាអ្នកអាចមើលថែគេទៅថ្ងៃក្រោយបាន អញ្ចឹងហើយ ទោះអ្នកសង្ហា ឬជាអ្នកមានក៏ដោយបើមិនចេះការពារ មនុស្សស្រីគេហ៊ានប្រថុយឡើយ។

៤. មនុស្សប្រុសពូកែយកចិត្តទុកដាក់

សម្រាប់មនុស្សស្រីការយកចិត្តទុកដាក់វាពិតជាសំខាន់ខ្លាំងណាស់ លើសពីនេះ ដូចដែលដឹងស្រាប់ហើយមនុស្សស្រីពូកែគិតច្រើន និងត្រូវការការលួងលោមខ្លាំង អញ្ចឹងហើយ ទើបមនុស្សស្រីគ្រប់រូបតែងប្រាថ្នាចង់ផ្ញើជីវិត​ និងសេចក្តីសុខរបស់គេ ទៅឱ្យមនុស្សប្រុសណាដែលពូកែយកចិត្តទុកដាក់ ព្រោះគេយល់ឃើញថា ការយកចិត្តទុកដាក់របស់មនុស្សប្រុស នឹងអាចធ្វើឱ្យគេមានក្តីសុខទៅថ្ងៃក្រោយ៕