ចំណុចពិសេសទាំងនេះ ដែលមនុស្សស្រីពូកែពិតតែងតែមាន
យល់ដឹង៖ មនុស្សស្រីដែលពូកែពិតប្រាកដ ជាមនុស្សស្រីម្នាក់ដែលមិនខ្លាចនឹងប្រឈមមុខទៅនឹងបញ្ហាក្នុងជីវិត ហើយរមែងតែឆ្លងកាត់វាបានដោយខ្លួនឯងមិនថាបញ្ហានោះ ជាបញ្ហាធំឬបញ្ហាតូចទេ ក៏មនុស្សស្រីពូកែពិត គេតែងតែអាចឆ្លងកាត់វាបានដោយភាពជឿជាក់។
ដូច្នេះដើម្បីក្លាយទៅជាមនុស្សស្រីពូកែម្នាក់បានលុះត្រាតែអ្នករាល់គ្នាត្រូវរៀនធ្វើខ្លួនឱ្យមានចំណុចពិសេសៗមួយចំនួន ដូចដែលបានរៀបរាប់នៅខាងក្រោមនេះជាមុនសិន ទើបអាចក្លាយទៅជាមនុស្សស្រីម្នាក់ដែលពូកែស្ទើរតែគ្រប់រឿង ហើយភាពពូកែនោះក៏នាំមនុស្សស្រីឱ្យជួបតែសេចក្តីសុខដែរ។
ចំណុចពិសេសទាំងនេះដែលមនុស្សស្រីពូកែពិតតែងតែមាន៖
១. មានគោលដៅច្បាស់លាស់
អាចក្លាយទៅជាមនុស្សស្រីដ៏ពូកែម្នាក់បានមនុស្សស្រីត្រូវតែមានគោលដៅច្បាស់លាស់នៅក្នុងខ្លួន ព្រោះថាបើគ្មានគោលដៅ មិនថាមានភាពប្រឹងប្រែងយ៉ាងណាក៏ជីវិតគ្មានថ្ងៃបានរីកចម្រើនទៅមុខដែរ ហេតុនេះ ការដែលមនុស្សស្រីចេះស្វែងរកគោលដៅក្នុងជីវិតខ្លួនឯងឃើញ គឺជាចំណុចពិសេសដែលមនុស្សស្រីពូកែពិតគេមាន។
២.ធ្វើអ្វីមួយប្រកបដោយភាពម៉ត់់ចត់
ការដែលធ្វើកិច្ចការអ្វីមួយប្រកបដោយភាពម៉ត់ចត់គឺវាបង្ហាពីភាពពូកែបុិនប្រសប់របស់មនុស្សស្រី ហេតុដូចនេះមនុស្សស្រីដែលចង់ក្លាយខ្លួនទៅជាមនុស្សស្រីពូកែពិតម្នាក់ដែរ គឺត្រូវតែធ្វើខ្លួនឱ្យចេះម៉ត់ចត់ និងមានទំនួលខុសត្រូវខ្ពស់ ទៅលើអ្វីដែលខ្លួនធ្វើទើបទទួលបានការគោរព និងឱ្យតម្លៃពីមនុស្សជុំវិញខ្លួន។
៣. មិនងាយពឹងផ្អែកលើអ្នកណាម្នាក់
ពិតណាស់មនុស្សស្រីដែលមានភាពពូកែ មិនងាយនឹងពឹងផ្អែកលើអ្នកណាម្នាក់ដោយងាយឡើយទោះមនុស្សម្នាក់ៗមិនអាចពូកែបានសព្វគ្រប់បែបយ៉ាងក៏ពិតមែន តែអ្វីដែលមនុស្សស្រីពូកែពិតគេមាន គឺការអត់ធ្មត់ និងចេះតស៊ូដោយខ្លួនឯងព្រោះថាពឹងលើគេ វាមិនងាយស្រួលដូចជាខិតខំធ្វើដោយខ្លួនឯងឡើយ។
៤. ចេះដាក់ខ្លួន
មនុស្សស្រីដែលគេពូកែពិតគេមិនចេះអួតអាងថាខ្លួនគេជាមនុស្សពូកែនោះទេ ផ្ទុយទៅវិញ មនុស្សស្រីដែលពូកែពិតប្រាកដ គេតែងតែចេះដាក់ខ្លួនថាខ្លួនគេជាមនុស្សមិនចេះអ្វីលើសពីនេះទៅទៀត មនុស្សស្រីដែលពូកែពិត រមែងតែចង់អភិវឌ្ឍ និងរៀនសូត្រពីមនុស្សនៅក្បែរខ្លួនគេជាមួយនិច្ច មិនមែនអាងតែខ្លួនឯងពូកែ មិនរាប់អ្នកណានោះទេ។
៥.អាចសម្របខ្លួនបានគ្រប់កាលៈទេសៈ
អ្វីដែលមនុស្សស្រីពូកែមានគឺការដែលចេះសម្របខ្លួនបានគ្រប់កាលៈទេសៈ ដោយមិនរឹងទទឹង និងមិនធ្វើអ្វីយល់តែពីចិត្តខ្លួនឯង នេះហើយដែលមនុស្សស្រីពូកែពិតគេមាន ដូច្នេះប្រសិនបើអ្នកចង់ឱ្យខ្លួនឯង ក្លាយទៅជាមនុស្សស្រីពូកែម្នាក់ គឺត្រូវចេះធ្វើខ្លួនឱ្យសម្របទៅតាមគ្រប់កាលៈទេសៈ ដោយមិនចេះតែរឹងទទឹងខុសគេ៕