ពេលមេឃក្តៅខ្លាំង អ្នកមិនគួរញ៉ាំអាហារ ៥មុខនេះច្រើនពេកទេ អាចបង្កគ្រោះថ្នាក់ដល់សុខភាព!
ចំណេះដឹង៖នៅក្នុងរដូវក្តៅ រាងកាយរបស់យើងនឹងខ្វះជាតិទឹក ហើយរាងកាយក៏ឡើងកម្តៅដែរ។ ពេលក្តៅ ហើយអស់កម្លាំង យើងច្បាស់ជាចង់ញ៉ាំអ្វីដែលជួយកាត់បន្ថយកម្តៅបានខ្លះ។ បើយោងតាមអ្នកជំនាញអាហារូបត្ថម្ភ បានឲ្យដឹងថា អាហារទាំងនេះ អ្នកគួរតែកាត់បន្ថយការញ៉ាំវា នៅពេលដែលមេឃក្តៅខ្លាំងដើម្បីចៀសវាងគ្រោះថ្នាក់ដល់សុខភាព៖
១. ការ៉េម
ពេលដែលមេឃក្តៅយើងច្បាស់ជាគិតថា បើបានញ៉ាំការ៉េមត្រជាក់ៗ ច្បាស់ជាឆ្ងាញ់ហើយស្រួលខ្លួនជាមិនខាន តែតាមពិតទៅ ការ៉េមនឹងធ្វើឲ្យសរសៃឈាម ក្នុងបំពងកតឹង អាចធ្វើឲ្យអ្នកពិបាកដកដង្ហើម។ ទាំងការ៉េម និងភេសជ្ជៈត្រជាក់ៗ ជាអាហារដែលធ្វើឲ្យរាងកាយកើនកម្តៅ វាអាចធ្វើឲ្យយើងមានអារម្មណ៍ថាក្តៅក្នុងពោះ ខុសពីការគិតរបស់យើង។
២. ផ្លែស្វាយ
ស្វាយ ជាផ្លែឈើដែលមានសារប្រយោជន៍ច្រើនចំពោះសុខភាព និងសម្រស់។ តែបើយើងញ៉ាំវាច្រើនពេក ពេលមេឃក្តៅខ្លាំងរាងកាយយើងនឹងកាន់តែក្តៅ ហើយអាចបណ្តាលឲ្យកើតមុនបាន។
៣. អាហារ FastFood
ជីវិតប្រចាំថ្ងៃម្នាក់ៗ គឺច្បាស់ជារវល់ណាស់ ដូច្នេះហើយទើប fast food ជាជម្រើសដ៏ល្អសម្រាប់មនុស្សភាគច្រើន។ តែបើយើងញ៉ាំអាហារប្រភេទនេះ មានខ្លាញ់ច្រើន ដែលធ្វើឲ្យប៉ះពាល់ដល់ពោះវៀន ធ្វើឲ្យការស្រូបយកជាតិទឹក និងសារធាតុចិញ្ចឹមចុះខ្សោយ។ ក្រៅពីនេះអ្នកជំនាញខាងអាហារូបត្ថម្ភអះអាងថា ញ៉ាំខ្លាញ់ច្រើនពេលមេឃក្តៅ ងាយធ្វើឲ្យឈឺពោះ រាគ ពិបាករំលាយអាហារ ជាដើម។
៤. សាច់គោ
សាច់គោត្រូវបានគេស្គាល់ថា ជាអាហារដែលសម្បូរសារធាតុចិញ្ចឹមច្រើន ជាពិសេសសម្បូរប្រូតេអ៊ីន តែអាហារដែលមានជាតិប្រូតេអ៊ីន និងខ្លាញ់ច្រើន អាចធ្វើឲ្យរាងកាយកើនកម្តៅ នៅពេលរំលាយ ដូចនេះយល់ល្អគួរចៀសវាង ញ៉ាំអាហារប្រភេទនេះពេលមេឃក្តៅ។
៥. សាច់អាំង
សាច់អាំងជាអាហារដ៏ពេញនិយម សម្រាប់មនុស្សជាច្រើននាពេលនេះ តែយើងគួរតែដឹងថា ពពួកអាហារទាំងនេះសម្បូរដោយខ្លាញ់ និងជាតិកូលេស្តូរ៉ុលមិនល្អ និងធ្វើឲ្យមានការរលាកក្នុងរាងកាយ។ លើសពីនេះ វាបង្កើនអាស៊ីតនិងធ្វើឲ្យពិបាករំលាយបើញ៉ាំពេលមេឃក្តៅខ្លាំង៕
