បែកគ្នាពីរខែ ពេលនេះ DAWN និង HyunA ត្រូវគ្នាវិញហើយ?
កូរ៉េខាងត្បូង៖ បើបកទៅរំឮក និងមើលគូស្នេហ៍សាធារណៈតារាចម្រៀង HyunA និង DAWN ពួកគេធ្លាប់បានប្រកាសពីការបែកគ្នានៅខែ វិច្ឆិកា ឆ្នាំ ២០២២ ដែលធ្វើឲ្យមហាជន ក៏ដូចជាអ្នកគាំទ្រមានការសោកស្ដាយចំពោះការសម្រេចចិត្តរបស់ពួកគេជាខ្លាំង។
ជាមួយគ្នានេះ គិតត្រឹមថ្ងៃទី ២៧ ខែមករា ឆ្នាំ ២០២៣ នេះ ពួកគេមានស្ថានភាពទំនាក់ទំនងថ្មី ដោយយោងតាម News1 បានឲ្យដឹង ថា HyunA និង DAWN បានត្រលប់មកត្រូវរ៉ូវគ្នាវិញហើយ។ ព្រោះមានគេរាយការណ៍ថា គេប្រទះឃើញពួកគេចូលរួមកម្មវិធីក្នុងស្រុក និងបរទេសជាមួយគ្នា កាលពីពេលថ្មីៗនេះ។ គេបាននិយាយថា ពួកគេហាក់មានភាពរួសរាយរាក់ទាក់ និងយកចិត្តទុកដាក់ចំពោះគ្នាខ្លាំងណាស់។
មិនតែប៉ុណ្ណោះ តាមប្រភពពីខាងក្នុងបានឲ្យដឹងថា អ្នកទាំងពីរបានទៅចូលរួមកម្មវិធីនៅក្រៅប្រទេស និងថតរឿងជាមួយគ្នា ហើយមិនបានលាក់បាំងពីស្នេហាជាមួយគ្នាឡើយ។
យ៉ាងណាមិញ ព័ត៌មាននេះ សម្រាប់ភាគីទាំងពីរ នៅតែមិនទាន់បានផ្តល់សេចក្តីថ្លែងការណ៍ជាផ្លូវការដូចអត្ថបទនេះនៅឡើយទេ។ តែយ៉ាងណា យើងមានតែចាំតាមដានបន្ត!
ប្រភព៖ koreaboo