RM ទម្លាយអារម្មណ៍ពិត ថាបទ Bicycle បង្កប់អត្ថន័យជ្រាលជ្រៅខ្លាំងចំពោះខ្លួនលោក!

June 8, 2021

កូរ៉េខាងត្បូង ៖ ដើម្បីអបអរសាទរ FESTA ឆ្នាំ ២០២១ ដែលជាខួបលើកទី៨ របស់ក្រុម BTS មេដឹកនាំក្រុមដ៏ឆ្នើមRM បានទម្លាក់បទចម្រៀងទោលថ្មីដែលមានចំណងជើងថា Bicycle ដើម្បីផ្ដល់ឲ្យ ARMY នូវចង្វាក់តន្រ្តីទន់ភ្លន់បែបមនោសញ្ចេតនាលួងលោម តាមរយៈបទចម្រៀងរបស់លោក។

ជាមួយគ្នានេះដែរ RM ក៏បានបង្ហាញអារម្មណ៍ពិតទាក់ទងនឹងបទថ្មីរបស់លោកដែលពោរពេញទៅដោយអត្ថន័យសំខាន់ និងមានបង្កប់ខ្លឹមសារជ្រាលជ្រៅខ្លាំងចំពោះលោក ហើយកង់ជាហេតុផលបំផុសគំនិតឲ្យលោកសរសេរបទBicycle នេះឡើង។

ខ្ញុំតែងតែចង់សរសេរចម្រៀងអំពីកង់។ វាមានរយៈពេល ៣ឆ្នាំហើយ ចាប់តាំងពីខ្ញុំបានចេញផ្សាយ Mono ខ្ញុំចាប់ផ្តើមមានអារម្មណ៍ហត់នឿយ ជាមួយនឹងការធ្វើអ្វីថ្មីដែលគ្មានពេលវេលាកំណត់ច្បាស់លាស់។ FESTA បានក្លាយជាកម្លាំងចិត្តដ៏សំខាន់ សម្រាប់ខ្ញុំ ហើយខ្ញុំបានបញ្ចប់ការសរសេរ និងចេញបទ Bicycle នេះឡើង។ បន្ទាប់ពីបានជិះកង់ជុំវិញគ្រប់ទិសទី ក្នុងចន្លោះខែកុម្ភៈ និងខែមីនា ទីបំផុតខ្ញុំអាចបំពេញពាក្យថា Bicycle ហើយយកវាទៅបញ្ចូលជាចង្វាក់ជាមួយ Guitar Melody ជាមួយបងប្រុស John Eun។ ខ្ញុំពិតជាបានសរសេរទំនុកច្រៀងពេលកំពុងជិះកង់។ ខ្ញុំបានច្រៀងវាជាច្រើនដង ដោយខ្ញុំមិនអាចរាប់បានទេ។ សម្រាប់រូបភាពដែលជា Cover ក្នុងបទចម្រៀង គឺធ្វើឡើងដោយសិល្បករដែលខ្ញុំគោរពស្រលាញ់ គឺ Moon Sung Sik។ ខ្ញុំស្រលាញ់ស្នាដៃការងាររបស់គាត់ណាស់។ សូមអំណរគុណចំពោះ John Eun និង Moon Sung Sik ដែលចូលរួមធ្វើការងារនេះជាមួយខ្ញុំ។
— RM

លើសពីនេះទៀត RM បានបន្តដោយសង្ឃឹមថា ហ្វេនៗរបស់លោកនឹងពេញចិត្ត តាមរយៈអំណោយមួយនេះរបស់លោក។

ខ្ញុំតែងតែទន្ទឹងរង់ចាំពេលវេលាដើម្បីជិះកង់។ រាល់ពេលដែលខ្ញុំចាប់ផ្តើមធ្វើដំណើរទៅមុខ ដោយការជិះកង់ ខ្ញុំមានអារម្មណ៍ថាខ្លួនឯង គឺមានមនោសញ្ចេតនាបន្តិចដែរ ដោយហេតុផលខ្លះ។ វាអាចមកពីខ្ញុំខកខានរឿងជាច្រើន…? ខ្ញុំមិនយល់ពីមូលហេតុដែលខ្ញុំមានអារម្មណ៍បែបនេះទេ។ ប្រហែលជាមកពី ខ្ញុំមិនទាន់មានប័ណ្ណបើកបរនៅឡើយក៏ថាបាន។ ទោះយ៉ាងណាខ្ញុំស្រលាញ់ពេលវេលាដែលខ្ញុំចំណាយលើការជិះកង់ ព្រោះកង់គឺជាអ្វីដែលធ្វើឲ្យខ្ញុំមានសេរីភាព។ ចម្រៀងអំពីកង់តែងតែជាគោលដៅសម្រាប់ខ្ញុំ ពីព្រោះខ្ញុំបានជិះវាតាំងពីខ្ញុំនៅជាអ្នកហ្វឹកហាត់។ ពេលយកជើងជាន់ឈ្នាន់កង់ ខ្ញុំតែងតែចង់ប្រែវាទៅជាបទចម្រៀងមួយដែលទាក់ទាញអារម្មណ៍ បង្កើតឲ្យមានមនោសញ្ចេតនាគួរឲ្យរំភើប ហើយមានអត្ថន័យដ៏កក់ក្តៅ។ ខ្ញុំសង្ឃឹមថាបទ Bicycle នឹងស្ថិតនៅក្នុងចម្រៀង Playlists របស់អ្នក។ ខ្ញុំសង្ឃឹមថាវានឹងក្លាយជាបទចម្រៀងដែលអ្នកនឹកដល់រាល់ពេលអ្នកជិះកង់។ ហើយក៏ខ្ញុំសង្ឃឹមថាអ្នកនឹងទទួលយកអំណោយដ៏តូចមួយតាមរយៈបទចម្រៀងដែលខ្ញុំផ្តល់ជូននេះ។ គ្មានអ្វីដែលធ្វើឲ្យខ្ញុំរីករាយជាងនេះទេ។ រាល់ថ្ងៃគឺជាថ្ងៃល្អសម្រាប់ការជិះ។ ប្រសិនបើអ្នកកំពុងធុញថប់ សោកសៅក្នុងចិត្ត សូមព្យាយាមជិះកង់។ ហើយ ខ្ញុំនឹងធ្វើដូចគ្នា!
— RM

បទ Bicycle

ប្រភព ៖ Koreaboo

អានបន្ថែម