មេរៀនជីវិត ៣ ពី J-Hope ដែលនឹងផ្លាស់ប្តូរជីវិតអ្នក ឲ្យស្រស់បំព្រង

January 27, 2023

កូរ៉េខាងត្បូង៖ តារាចម្រៀង J-Hope ដែលត្រូវបានគេស្គាល់ថាជា «សសរស្តម្ភ» របស់ក្រុម BTS ដែលមានចិត្តគំនិតរឹងមាំ និងស្ថិរភាពរបស់លោក មានទស្សនៈចាស់ទុំ និងគិតគូរអំពីជីវិតដែលមនុស្សជាច្រើនអាចរៀនបាន។ លោកមានចិត្តរាបសា ឧស្សាហ៍ព្យាយាម និងគិតយ៉ាងស៊ីជម្រៅលើអ្វីៗដែលលោកធ្វើ។

នៅក្នុងបទសម្ភាសន៍ថ្មីៗនេះ ជាមួយ Disney+ តារាប្រុស J-Hope បានបង្ហាញពីឧត្តមគតិរបស់ខ្លួនមួយចំនួន ដែលបង្ហាញពីមូលហេតុដែលលោកទទួលបានជោគជ័យខ្លាំងនាពេលបច្ចុប្បន្ននេះ។

ហើយខាងក្រោមនេះ ជាមេរៀនជីវិតទាំងបី ដែលយើងទាំងអស់គ្នាអាចរៀនពីតារារូបនេះបាន!

១.ការខិតខំប្រឹងប្រែងរបស់អ្នកមិនដែលក្បត់អ្នកទេ

J-Hope បានជ្រើសរើស «ការខិតខំប្រឹងប្រែងរបស់អ្នកមិនដែលក្បត់អ្នក» ជាប្រយោគដែលលោកចូលចិត្ត។

ការខិតខំប្រឹងប្រែងលើអ្វីគ្រប់យ៉ាងដែលលោកធ្វើ ត្រូវការការងារច្រើន ប៉ុន្តែវាតែងតែផ្តល់ផលប្រយោជន៍ដល់លោកតាមមធ្យោបាយណាមួយ។

តាមពិតខ្ញុំខំប្រឹងប្រែងច្រើន។ មិនថាអ្វីនោះទេ ដូចជា មិនថា ខ្ញុំកំពុងធ្វើការ ឬហាត់សម ឬជួបមនុស្ស សូម្បីតែក្នុងពេលនេះ... ខ្ញុំគិតថា រាល់ការខិតខំប្រឹងប្រែងរបស់ខ្ញុំដែលខ្ញុំបានព្យាយាមធ្វើ មិនដែលក្បត់ខ្ញុំទេ។
— J-Hope

២.សុខភាព ស្នេហា ការងារ ជាធាតុផ្សំនៃសុភមង្គល

ជម្រើសដំបូងរបស់ J-Hope គឺ សុខភាព ។

ជាដំបូង គឺសុខភាព! វាសំខាន់បំផុតសម្រាប់មនុស្សគ្រប់គ្នា។ យើងទាំងអស់គ្នាត្រូវតែមានសុខភាពល្អ។ ហើយនៅពេលដែលខ្ញុំមានសុខភាពល្អ ខ្ញុំអាចលេង ឬសម្តែងតន្ត្រីរបស់ខ្ញុំជូនអ្នក និងអ្វីៗផ្សេងទៀតដែលទាក់ទងនឹងការងាររបស់ខ្ញុំ។
— J-Hope

បន្ទាប់មកតារាប្រុសរូបនេះ បានជ្រើសរើស ស្នេហា។

មិនថាអ្នកស្រឡាញ់នរណាម្នាក់ ឬត្រូវបានអ្នកណាម្នាក់ស្រឡាញ់អ្នក ខ្ញុំគិតថា សេចក្ដីស្រឡាញ់ ជាផ្នែកមួយដ៏ធំនៃការរក្សាសុភមង្គល។ បើគ្មានសេចក្តីស្រឡាញ់ទេ ខ្ញុំគិតថា យើងមិនអាចរីករាយនឹងភាពស្រស់ស្អាតនៃពិភពលោកនេះ ឬស្នាមញញឹមបានទេ។ អារម្មណ៍ទាំងអស់ដែលយើងចែករំលែក វាបានមកពីផ្នែកតូចៗនៃសេចក្ដីស្រឡាញ់។
— J-Hope

មួយវិញទៀត ជាចុងក្រោយ J-Hope បានជ្រើសរើស ការងារ ជាផ្នែកចាំបាច់បំផុតនៃសុភមង្គលរបស់លោក។

ធាតុផ្សំចុងក្រោយគឺ ការងារ។ នេះអាចជារឿងចម្រូងចម្រាស ដោយសារយើងតែងតែគិតថា ខ្ញុំចង់លាឈប់ សុំឈប់ធ្វើការ តើពេលណាខ្ញុំអាចចេញពីរឿងនេះបាន ។ល។ ប៉ុន្តែខ្ញុំគិតថាខ្ញុំអាចរីករាយនឹងការសម្រាករបស់ខ្ញុំបានយ៉ាងពេញទំហឹង ចាប់តាំងពីខ្ញុំធ្វើការខ្លាំង ខ្ញុំអាចទទួលបាននូវភាពស្រស់ស្អាតនៃការសម្រាករបស់ខ្ញុំ។
— J-Hope

J-Hope បង្ហើបថា ការងារផ្តល់ឲ្យលោកនូវរឿងវិជ្ជមានជាច្រើន។ វាអនុញ្ញាតឲ្យលោករីករាយនឹងការសម្រាក ផ្តល់ឲ្យលោកនូវអារម្មណ៍នៃភាពជោគជ័យ លើកទឹកចិត្តលោក និងអនុញ្ញាតឲ្យលោករីករាយនឹងអ្វីផ្សេងទៀតនៅពេលក្រោយ។

៣.ការចេះដឹងគុណគ្រប់ពេល

ទស្សនៈរបស់ J-Hope គឺអំពីការរស់នៅដោយការដឹងគុណ។

នេះជាអ្វីដែលខ្ញុំតែងតែនិយាយ។ ត្រូវដឹងគុណរាល់ពេល។ នេះជាបាវចនារបស់ខ្ញុំ។ ពេលខ្លះខ្ញុំគិតដូចជា «តើខ្ញុំបានរួមចំណែកអ្វីខ្លះដល់ពិភពលោកក្នុងជីវិតពីមុន ដើម្បីខ្ញុំអាចជួបមនុស្សទាំងអស់នេះ ជ្រើសរើសការងារនេះ ទទួលបានសេចក្តីស្រឡាញ់ដ៏លើសលប់ ហើយក្លាយជាមនុស្សម្នាក់ដែលទទួលបានការចាប់អារម្មណ៍នៅក្នុងពិភពលោក? នេះនៅតែអស្ចារ្យ!
— J-Hope

លោកជឿថា នេះគឺជាអ្វីដែលលោកមិនអាចសម្រេចបានក្នុងជីវិតមួយផ្សេងទៀត ទោះបីជាលោកបានកើតជាថ្មីក៏ដោយ ដូច្នេះ J-Hope មិនដែលចំណាយពេលមួយភ្លែតទេ។ ដោយសារតែហេតុនេះ ការដឹងគុណបានធ្វើឲ្យលោកក្លាយជាមនុស្សមានសុភមង្គលខ្លាំង។

ប្រភព៖ koreaboo

ទាក់ទងជាមួយ:

តារាកូរ៉េ

អានបន្ថែម