តារាប្រុសកូរ៉េ ក្រោយដល់អាយុធ្វើទាហាន សុទ្ធតែជួបបញ្ហាទាំងនេះ?
កូរ៉េខាងត្បូង៖ រយៈពេលនៃការចូលបម្រើការងារយោធា តែងតែបាននាំមកនូវគុណវិបត្តិជាច្រើនដល់តារាកូរ៉េមួយចំនួន ដោយពួកគេអាចប្រឈមនឹងការធ្លាក់ចុះនៃប្រជាប្រិយភាព ពេលបម្រើក្នុងជួរយោធា។
ជាការពិតណាស់ នៅប្រទេសកូរ៉េខាងត្បូង បុរសដែលមានអាយុពី ១៨ឆ្នាំ ទៅ ២៨ ឆ្នាំ ត្រូវបានតម្រូវឲ្យបំពេញកាតព្វកិច្ចយោធា ជាមធ្យមរយៈពេល ២ឆ្នាំ។ ហើយបើនិយាយចំពោះ សម្រាប់តារា Kpop វិញ កាតព្វកិច្ចនេះជួនកាល អាចនាំមកនូវភាពរអាក់រអួលជាច្រើន ដល់ពួកគេ ក្នុងការងារសិល្បៈ។
១.កេរ្តិ៍ឈ្មោះធ្លាក់ចុះ
ឧស្សាហកម្មកូរ៉េមានការរីកចម្រើនលឿនណាស់ ខណៈដែលជារៀងរាល់ឆ្នាំមានក្រុមមួយចំនួនទៀត បានបង្ហាញខ្លួនជាមួយនឹងសិល្បៈតាមផ្នែកផ្សេងៗ។ ដូច្នេះហើយ ការឈប់ពីអាជីពរយៈពេលពីរឆ្នាំ អាចកាត់បន្ថយប្រជាប្រិយភាព និងភាពជោគជ័យ នាពេលអនាគតរបស់តារា K-pop ទាំងនោះ។ កត្តាមួយទៀតដែលធ្វើឲ្យប្រជាប្រិយភាពរបស់តារា K-pop ធ្លាក់ចុះ គឺដោយសារមិនសូវមានការប្រាស្រ័យទាក់ទងជាមួយអ្នកគាំទ្រជាប្រចាំ។
ជាធម្មតា អ្នកគាំទ្រ និងតារា Kpop តែងតែទាក់ទងគ្នាទៅវិញទៅមក តាមរយៈការ LIVE។ ទោះជាយ៉ាងណាក៏ដោយ សកម្មភាពនេះត្រូវបានរំខាន នៅពេលដែល Idol បានចុះឈ្មោះចូលក្នុងជួរកងទ័ព។ ជាក់ស្ដែង បើយោងតាមតារាចម្រៀងប្រុស Kim Hyung Jun សមាជិកក្រុម SS501 តែងតែព្រួយបារម្ភអំពីការដែល Fan ភ្លេច នៅពេលដែលលោកផ្អាកសកម្មភាពដើម្បីចូលបម្រើកងទ័ព។ ដោយឡែក សម្រាប់តារា K-Pop ផ្សេងទៀតដូចជាសមាជិកក្រុម EXO ដែលមាន Xiumin និងមេក្រុម Suho អ្នកទាំងពីរបានជ្រើសរើសពន្យាពេលចូលបម្រើកងទ័ពរហូតដល់អាយុ ២៩ឆ្នាំ ដើម្បីរក្សាប្រជាប្រិយភាពរបស់ពួកគេបានយូរ។
២. ភាពលំបាក នៅពេលដែលក្រុមដំណើរការ តែខ្វះសមាជិក
ក្នុងឆ្នាំ ២០១៩ សកម្មភាពរបស់ក្រុម Shinee ស្ទើរតែត្រូវបានរាំងស្ទះ នៅពេលដែលសមាជិក ៣ នាក់គឺ Key, Minho និងមេដឹកនាំ Onew បានចូលបម្រើកងទ័ពរៀងៗខ្លួន។ បន្ទាប់ពីនោះ សមាជិកវ័យក្មេងបំផុត Tae Min ត្រូវធ្វើការជាអ្នកសិល្បៈទោល។ នៅពេលនោះ តារាចម្រៀងប្រុសរូបនេះ បានចេញអាល់ប៊ុម Famous ប៉ុន្តែមិនបានដូចការរំពឹងទុកនោះទេ។ ហើយបន្ទាប់ពីសមាជិក Shinee ៣ នាក់ត្រូវបានរំសាយចេញពីជួរកងទ័ព ក្រុមនេះមានឱកាសតែមួយគត់ ដើម្បីធ្វើការងារយ៉ាងពេញលេញ ក្នុងអំឡុងពេលផ្សព្វផ្សាយអាល់ប៊ុម Atlantis។ បន្ទាប់ពីនោះ Tae Min បានដល់វេនចូលបម្រើកងទ័ពម្ដង នៅខែឧសភា ឆ្នាំ ២០២១ ហើយសមាជិក ៣នាក់ដែលនៅសល់ផ្តោតលើគោលដៅផ្ទាល់ខ្លួន។
ដោយឡែក នៅពេលដែល Do Kyung Soo សមាជិកក្រុម EXO និង Xiumin បានចូលបម្រើកងទ័ព អ្នកគាំទ្របានសម្តែងការសោកស្តាយភ្លាមៗ ដែលតារាចម្រៀងទាំងពីរមិនអាចមានវត្តមាននៅក្នុងអាល់ប៊ុម Obsession។ ពួកគេគិតថា EXO គឺមានទាក់ទាញសម្រាប់តែនៅពេលដែលមានសមាជិកទាំងអស់៨នាក់ប៉ុណ្ណោះ។
៣. ការបៀតបៀននៅក្នុងជួរកងទ័ព
យោងតាមទូរទស្សន៍ Seoulite TV តារាចម្រៀងប្រុស G-Dragon (Big Bang) ត្រូវបានគេយាយីជាច្រើនដង ក្នុងពេលនៅក្នុងជួរកងទ័ព។ ទាហានដទៃបានគូររាងកាយរបស់ G-Dragon ដែលបង្ហាញពីកន្លែងដែលមានស្នាមអុចខ្មៅ ប្រជ្រុយ ស្នាមសាក់ ឬស្លាកស្នាមរបស់មេក្រុម Big Bang ហើយផ្ញើទៅមិត្តស្រីរបស់ពួកគេ។
ព័ត៌មាននេះបន្ទាប់មក បានផ្សព្វផ្សាយយ៉ាងឆាប់រហ័ស នៅលើបណ្ដាញអ៊ីនធឺណិត។ ហើយទូរទស្សន៍ Seoulite TV រាយការណ៍ទៀតថា ទាហានក្នុងចំណោមនោះ ថែមទាំងបានលួចទ្រព្យសម្បត្តិរបស់ G-Dragon ទៀតផង។ ការយាយីបានកើតឡើងជាញឹកញាប់ ដែលធ្វើឲ្យមេបញ្ជាការកងទ័ពនៅទីនោះ បានផ្លាស់ប្តូរអង្គភាពការងាររបស់ G-Dragon ។
ប្រភព៖ zingnews