បើក្លាយជាសង្សារ Kim Soohyun អ្នកនឹងឃើញរូបភាពបែបនេះរាល់ថ្ងៃ

កូរ៉េខាងត្បូង៖ អាចនិយាយបានថា Kim SooHyun ជាតារាសម្ដែងកូរ៉េខាងត្បូងដ៏មានប្រជាប្រិយភាពម្នាក់។ មិនត្រឹមតែមានឈ្មោះល្បីល្បាញទូទាំងប្រទេសកូរ៉េខាងត្បូងនោះទេ ប៉ុន្តែតារារូបនេះមានអ្នកគាំទ្រពីបណ្ដាប្រទេសផ្សេងៗជាច្រើនផងដែរ។ បើក្រឡេកទៅមើលគណនី Instagram វិញ គេសង្កេតឃើញថាគណនីរបស់លោកចាប់ផ្ដើមមានអ្នកចុច Follow ច្រើនជាបន្តបន្ទាប់ ក្រោយរឿង «It’s Okay To Not Be Okay» បានបញ្ចប់។ 

ពិតណាស់ Kim SooHyun ជាតារាលំដាប់កំពូល ប៉ុន្តែតារារូបនេះក៏និយមបង្ហោះរូបភាពបែបឃ្យូត ព្រមជាមួយការលេងទឹកមុខមើលទៅពិតជាគួរឲ្យក្នាញ់ ហើយកំប្លែងទៀតផង។ 

លើសពីនេះទៅទៀត ការបង្ហាញចរិតដ៏គួរឲ្យស្រលាញ់ វាបានធ្វើឲ្យហ្វេនមានអារម្មណ៍ល្អទៀតផង ក្រោយពេលមើលរូបតារាទាំងនេះរួច។ 

មួយវិញទៀត កម្លោះសង្ហារូបនេះតែងតែបង្ហោះរូបភាពមួយសន្លឹកៗ បើទោះបីជារូបភាពទាំងនោះ ត្រូវបានថតកន្លែងតែមួយ សម្លៀកបំពាក់តែមួយក៏ពិតមែន។ ភាគចិត្តណាស់ដែលបង្ហោះរូបដាក់ផ្ដុំគ្នាជាផុសតែមួយ ដូចជាតារាដទៃផ្សេងទៀត។

ហ្វេនប្រាកដជាបានដឹងហើយថា ភាគច្រើន Kim SooHyun ឧស្សាហ៍ដើរលេងបង្ហាញនៅទីកន្លែងថ្មីៗ ចែកជូនហ្វេនៗផងដែរ។ មួយវិញទៀត ទីកន្លែងដែលលោកចូលចិត្តទៅគឺបែបផ្សងព្រេង ឡើងភ្នំជាដើម។ 

មិនតែប៉ុណ្ណោះតារារូបនេះ ក៏ជាអ្នកនិយមចូលចិត្តលេងកីឡា ដូចជាការជិះកង់ជាដើម។ ហើយហ្វេនណាខ្លះ ដែលមិនចូលចិត្តការស្លៀកពាក់ខោអាវបែបកីឡារបស់តារារូបនេះនោះ មើលទៅទាំងសង្ហា និងមានមន្តស្នេហ៍តែម្ដង។

មិនត្រឹមតែចូលចិត្តលេងកីឡាប៉ុណ្ណោះទេ តារារូបនេះក៏ចូលចិត្តខាងថតរូបថែមទៀតផង។

ពេលខ្លះគេឃើញបង្ហោះរូបពីសកម្មភាពការមើល Script មើលទៅពិតជាខំប្រឹងប្រែងដើម្បីសម្ដែងឲ្យបានល្អ ហើយពេលខ្លះក៏ឃើញដេកលក់អំឡុងពេលកំពុងទន្ទេញប៉ារ៉ូល។ 

រូបភាពគ្រប់សន្លឹកឃើញថាសង្ហាទៅហើយ តែពេលតារារូបនេះលេងទឹកមុខប្លែកៗ ឃើញថារឹតតែសង្ហាមានមន្តស្នេហ៍តែម្ដង។

សឹងមិនគួរឲ្យជឿ គ្រប់ពេលដែលកំពូលតារារូបនេះតុបតែងខ្លួន ទោះស្លៀកក្នុងសម្លៀកបំពាក់បែបណាក៏ឃើញថាលេចធ្លោ។

បើប្រៀបធៀបពីការតែងខ្លួនធម្មតាសាមញ្ញៗ និងការរៀបចំខ្លួនស្លៀកឈុតខោអាវធំ ប្រាកដជាធ្វើឲ្យហ្វេនពិបាកជ្រើសរើសថាយកមួយណាមិនខាន។