សូម្បីតែនាឡិកាឆ្លាត Apple Watch Pro ជំនាន់បន្ទាប់ ក៏ល្បីថា នឹងមានមុខងារទំនាក់ទំនង តាមផ្កាយរណបដែរ

បរទេស៖ អស់រយៈពេលជាងមួយឆ្នាំ មានពាក្យចចាមអារ៉ាមថា ក្រុមហ៊ុន Apple កំពុងធ្វើការលើសមត្ថភាពក្នុងការនាំយក មុខងារផ្កាយរណបទៅកាន់ iPhone។ ដំបូងឡើយ វាត្រូវបានគេបង្ហាញថា នឹងមានសម្រាប់ស៊េរី iPhone 13 ប៉ុន្តែមុខងារនេះអាចនឹងមានវត្តមាន ជាមួយការមកដល់ iPhone 14 នាពេលខាងមុខ។

ខណៈពេលដែលមុខងារនេះជួយអ្នកប្រើប្រាស់ iPhone រាយការណ៍ពីភាពអាសន្ននៅក្នុងតំបន់ដែលមិនមានសេវាទូរសព្ទ ឥឡូវនេះវាត្រូវបានពិភាក្សាដោយក្រុមហ៊ុន Apple ដោយនឹងនាំយកមុខងារនេះ ទៅកាន់ Apple Watch Pro ជំនាន់ថ្មី។ ព័ត៌មាននេះបានមកពី លោក Mark Gurman របស់សារព័ត៌មាន Bloomberg នៅក្នុងព្រឹត្តិបត្រព័ត៌មាន Power On របស់គាត់។

យោងតាមអ្នកសារព័ត៌មានរូបនេះបានឲ្យដឹងថា ជំនាន់ថ្មីនៃ Apple Watch Pro ដ៏រឹងមាំ ដែលមិនទាន់ប្រកាសនៅឡើយ អាចនឹងមានមុខងារផ្កាយរណប។ ក្រុមហ៊ុនក៏បានពិភាក្សាផ្ទៃក្នុង អំពីគំនិតនៃការផ្ដល់នូវមុខងារផ្កាយរណបមកកាន់នាឡិការបស់ខ្លួន ដែលអាចនឹងសមហេតុសមផល សម្រាប់កំណែអនាគតនៃ Apple Watch Pro ថ្មី ដែលមាំ។ មុខងារនេះមិនត្រូវបានគេរំពឹងទុកសម្រាប់ Apple Watch Pro ជំនាន់ដំបូងនោះទេ៕

ប្រភព: 9to5Mac