ក្រុមហុ៊ន Smart Axiata ចាប់ផ្តើមយុទ្ធនាការអក្ខរកម្មឌីជីថល ដើម្បីជួយពលរដ្ឋកម្ពុជាឱ្យប្រើប្រាស់ប្រព័ន្ធអ៉ីបធឺណិតប្រកបដោយសុវត្ថិភាព និងទំនួលខុសត្រូវ!

December 27, 2021

ភ្នំពេញ៖ ក្រុមហ៊ុនSmart Axiataដែលជាប្រតិបត្តិករទូរគមនាគមន៍ចល័តឈានមុខគេនៅកម្ពុជាបានចាប់ផ្ដើមយុទ្ធនាការអក្ខរកម្មឌីជីថល ដែលមានកម្មវិធីពិភាក្សាលើប្រព័ន្ធអ៉ីនធឺណិតនិងសៀវភៅណែនាំស្ដីពីអក្ខរកម្មឌីជីថល ក្នុងបំណងជួយឱ្យប្រជាពលរដ្ឋកម្ពុជាប្រើប្រាស់ប្រព័ន្ធអ៉ីនធឺណិតប្រកបដោយសុវត្ថិភាពក៏ដូចជាជួយសិស្សានុសិស្សឱ្យចេះប្រើប្រាស់មុខងារឌីជីថលកាន់តែប្រសើរក្នុងការរស់នៅប្រចាំថ្ងៃនិងការសិក្សារៀនសូត្ររបស់ពួកគេ។

កម្មវិធី «សុវត្ថិភាពលើប្រព័ន្ធអ៉ីនធឺណិត និងការការពារក្មេងវ័យជំទង់ក្នុងយុគសម័យឌីជីថល» មានចាក់ផ្សាយភាគទីមួយ និងភាគទីពីរ លើទំព័រហ្វេសប៊ុក Smart for Cambodia និងទំព័រហ្វេសប៊ុក Kit Kou Kon។ ភាគទី៣ នឹងត្រូវចាក់ផ្សាយក្នុងពេលប៉ុន្មានសប្ដាហ៍ខាងមុខនេះ។

កម្មវិធីកិច្ចពិភាក្សានេះត្រូវបានផលិតឡើងដោយមានការគាំទ្រពីក្រសួងប្រៃសណីយ៍ និងទូរគមនាគមន៍ និងក្រសួងអប់រំ យុវជន និងកីឡា មូលនិធិនៃការកសាងសមត្ថភាព និងការស្រាវជ្រាវនិងការអភិវឌ្ឍ លេីវិស័យទូរគមនាគមន៍និងបច្ចេកវិទ្យាគមនាគមន៍និងព័ត៌មាន (CBRD) គិតគូរកូន (Kit Kou Kon) អង្គការយូនីសេហ្វកម្ពុជា និងអង្គការមិនមែនរដ្ឋាភិបាលក្នុងស្រុកដែលជាដៃគូ រួមទាំងអង្គការសកម្មភាពដើម្បីកុមារ(APLE) និងអង្គការបុត្តាភិបាលដើម្បីវឌ្ឍនសង្គមកម្ពុជា (ICS)។

កម្មវិធីពិភាក្សាតាមអនឡាញដែលមាន ៣ភាគ ហើយភាគនីមួយៗមានរយៈពេល២០នាទីនេះ បង្ហាញពីឱកាស និងហានិភ័យពាក់ព័ន្ធនឹងការប្រើប្រាស់អុិនធឺណិតរបស់កុមារ និងក្មេងវ័យជំទង់ខណៈក្រុមអ្នកជំនាញក៏បានផ្ដល់ការណែនាំស៊ីជម្រៅផងដែរអំពីការចិញ្ចឹមកូនក្នុងសម័យឌីជីថលសម្រាប់អាណាព្យាបាល និងគន្លឹះវិធីសាស្ដ្រជួយឱ្យក្មេងវ័យជំទង់មានសុវត្ថិភាពលើប្រព័ន្ធអុិនធឺណិត។

ក្រៅពីការអប់រំក៏មានកម្មវិធីកម្សាន្ដដែលជាការសម្ដែងសិល្បៈផងដែរពីសំណាក់សិល្បៈករនិងសិល្បៈការនីល្បីឈ្មោះរួមមាន ក្រុមក្មេងខ្មែរ និងកញ្ញា ចិត្ត កញ្ជនា។

លោក Feiruz Ikhwan នាយកប្រតិបត្ដិស្តីទីរបស់ក្រុមហ៊ុនSmart Axiata បានមានប្រសាសន៍ថា៖

«ស្របពេលដែលប្រទេសកម្ពុជាកំពុងសម្រេចគោលដៅសេដ្ឋកិច្ចឌីជីថលរបស់ខ្លួន ក្រុមហ៊ុន Smart ក៏កំពុងសហការជាមួយរាជរដ្ឋាភិបាលក្នុងការពង្រឹងមូលដ្ឋានគ្រឹះសម្រាប់ការប្រែក្លាយសង្គមតាមរយៈបច្ចេកវិទ្យាឌីជីថល និងគ្រឹះសម្រាប់អក្ខរកម្មឌីជីថលក្នុងព្រះរាជាណាចក្រកម្ពុជា។គំនិតផ្ដួចផ្ដើមនេះនឹងជួយពង្រឹងសមត្ថភាពសិស្សានុសិស្សក្នុងការប្រើប្រាស់ឧបករណ៍ឌីជីថលផ្សេងៗ ដើម្បីឆ្ពោះទៅកាន់របៀបរបបរស់នៅបែបឌីជីថលកាន់តែទំនើបក្នុងជីវិតប្រចាំថ្ងៃ ការងារ និងការសិក្សារបស់ពួកគេ។ កម្មវិធីពិភាក្សាលើប្រព័ន្ធអ៉ីនធឺណិតនេះក៏នឹងផ្ដល់ការអប់រំទៅកាន់មនុស្សកាន់តែច្រើនថែមទៀត អំពីវិធីដែលពួកគេអាចការពារខ្លួនឯង និងមនុស្សជាទីស្រឡាញ់របស់ពួកគេនៅពេលដែលពួកគេប្រើប្រាស់អុិនធឺណិត»។

ក្រុមហ៊ុន Smartនិងក្រសួងអប់រំ យុវជន និងកីឡា ក៏នឹងបង្កើត “សៀវវភៅណែនាំស្តីពីអក្ខរកម្មឌីជីថល” ផងដែរដែលនឹងចែកចាយទៅកាន់សិស្សានុសិស្សទូទាំងប្រទេសចាប់ពីខែកុម្ភៈឆ្នាំក្រោយទៅ។សៀវភៅមគ្គុទេសដែលមានកម្រាសជាង៣០ទំព័រនេះនឹងអប់រំសិស្សានុសិស្សអំពីរបៀបប្រើប្រាស់អ៉ីនធឺណិតប្រកបដោយផលិតភាពខណៈដែលណែនាំពួកគេអំពីរបៀបការពារខ្លួនឯងផងដែរ។

អ្នកស្រី តាន់ សុដានីប្រធាននាយកដ្ឋានគោលនយោបាយបច្ចេកវិទ្យាគមនាគមន៏និងព័ត៌មាន នៃក្រសួងប្រៃសណីយ៍និងទូរគមនាគមន៍បានថ្លែងថា៖

«កិច្ចការពារកុមារលើប្រព័ន្ធអនឡាញត្រូវការការចូលរួមពីគ្រប់ភាគីពាក់ព័ន្ធដែលក្នុងនោះរួមទាំងប្រតិបត្តិករទូរគមនាគមន៍ដែរ។ការបង្កើតឡើងនូវកម្មវិធីជជែកពិភាក្សាអំពីបញ្ហានេះរបស់ក្រុមហ៊ុនស្មាត អាស្យាតា គឺជាគំរូដ៏ល្អមួយ ដែលបង្ហាញពីការទទួលខុសត្រូវខ្ពស់របស់ប្រតិបត្តិករទូរគមនាគមន៍ក្នុងការគិតគូរពីសុវត្ថិភាពអុិនធឺណិតដល់សាធារណជននិងអតិថិជនរបស់ខ្លួន»។

ក្រុមហ៊ុន Smart Axiata បានគាំទ្រយ៉ាងស្វាហាប់ដល់ការសម្រេចគោលដៅឌីជីថលរបស់កម្ពុជាហើយក្រុមហ៊ុនបានផ្តួចផ្តើមកម្មវិធីអប់រំបច្ចេកវិទ្យាឌីជីថលជាច្រើនរួមមានដូចជាកម្មវិធីSmartStart Young Innovator Programដែលមានបំណងជំរុញ ផ្តល់លទ្ធភាពនិងធ្វើឱ្យរីកចម្រើនគំនិតអាជីវកម្មពាក់ព័ន្ធនឹងបច្ចេកវិទ្យា និងកម្មវិធីSmartSparkដែលជាកម្មវិធីមួយដែលណែនាំមធ្យោបាយសំខាន់ៗដើម្បីដោះស្រាយបញ្ហាប្រឈមធំៗបំផុតរបស់កម្ពុជា។

ក្នុងឆ្នាំ២០១៩ ក្រោមការសហការជាមួយក្រុមហ៊ុន Google និងសមាគម GSMAដែលជាសមាគមពាណិជ្ជកម្មពិភពលោកសម្រាប់ប្រតិបត្តិករបណ្តាញចល័ត ក្រុមហ៊ុនSmartបានបណ្តុះបណ្តាលសិស្សានុសិស្សកម្ពុជាជាង ១.៥០០នាក់ នៅក្នុងរាជធានីភ្នំពេញ និងខេត្តចំនួនពីរអំពីព័ត៌មានដែលមានប្រយោជន៍ទាក់ទងនឹងអក្ខរកម្មឌីជីថល និងសុវត្ថិភាពលើប្រព័ន្ធអុិនធឺណិត។

សម្រាប់ព័ត៌មានបន្ថែមអំពីកម្មវិធី និងសកម្មភាពទាក់ទងនឹងអក្ខរកម្មឌីជីថលរបស់ក្រុមហ៊ុនSmart Axiataសូមតាមដានទំព័រហ្វេសប៊ុក www.facebook.com/smartforcambodia ឬចូលទៅកាន់គេហទំព័រ www.smart.com.kh៕

អំពីក្រុមហ៊ុន Smart

ក្រុមហ៊ុន Smart Axiata Co., Ltd. ជាប្រតិបត្ដិករទូរគមនាគមន៍ចល័តឈានមុនគេក្នុងព្រះរាជាណាចក្រកម្ពុជា។បច្ចុប្បន្នក្រុមហ៊ុនបាននិងកំពុងបម្រើអតិថិជនចំនួន ៧.៥ លាននាក់ស្ថិតក្រោមស្លាកសញ្ញា “Smart”។ Smart Axiata គឺជាក្រុមហ៊ុនបុត្រសម្ព័ន្ធរបស់ក្រុមហ៊ុនមេ មានឈ្មោះថា “Axiata Group Berhad”ដែលជាក្រុមហ៊ុនផ្ដល់សេវាទូរគមនាគមន៍ធំជាងគេបង្អស់មួយក្នុងទ្វីបអាស៊ី។

ក្រុមហ៊ុន Smart គឺជាប្រតិបត្តិករទូរគមនាគមន៍ចល័តដែលមានភាពឈានមុខគេបង្អស់ផ្នែកសេវាបច្ចេកវិទ្យាទំនើបទាន់សម័យក្នុងព្រះរាជាណាចក្រកម្ពុជា។ក្រុមហ៊ុន Smart គឺជាប្រតិបត្ដិករដំបូងបង្អស់ដែលបានដាក់ឱ្យដំណើរការសេវាបច្ចេកវិទ្យាជំនាន់ទី៤“4G LTE” ក្នុងឆ្នាំ២០១៤ បច្ចេកវិទ្យា 4G+ ក្នុងឆ្នាំ២០១៦បច្ចេកវិទ្យា 4G+ ជាមួយ HD Voice (VoLTE) និង 4G LTE Advance Pro ក្នុងឆ្នាំ២០១៧។នៅពាក់កណ្តាលឆ្នាំ២០១៩ Smart បានរៀបចំកម្មវិធីបង្ហាញសាកល្បងបច្ចេកវិទ្យាជំនាន់ទី៥ “5G”ដំបូងគេបង្អស់នៅកម្ពុជាដោយបង្ហាញពីភាពជាអ្នកដឹកនាំផ្នែកសេវាទិន្នន័យចល័ត។ ក្រុមហ៊ុន Smart ក៏មានផ្ដល់នូវបច្ចេកវិទ្យាទូរស័ព្ទចល័តដ៏សម្បូរបែបរួមមាន៖សេវាបច្ចេកវិទ្យា 2G, 2.5G, 3G និង3.75G ក៏ដូចជាសេវាកម្មទូរស័ព្ទក្រៅប្រទេស (Roaming) ដែលអាចប្រើបានច្រើនជាង ១៩០ប្រទេស។ Smart បាននិងកំពុងផ្តល់សេវាគ្របដណ្តប់ក្នុងតំបន់ប្រជាសាស្ត្រច្រើនជាង៩៩% (កៅសិបប្រាំបួន) ភាគរយ នៅទូរទាំងព្រះរាជាណាចក្រកម្ពុជា ។

ក្រុមហ៊ុនក៏កំពុងបម្លែងខ្លួនយ៉ាងសកម្មទៅជាប្រតិបត្តិករបែបឌីជីថលតាមរយៈការផ្ដល់នូវសេវាកម្មនិងកម្មវិធីកម្សាន្តលក្ខណៈស៊ីវិល័យប្រកបដោយភាពច្នៃប្រឌិតជាច្រើន។នេះរួមបញ្ចូលភាពជាដៃគូជាមួយភាគីអន្តរជាតិនានាដូចជា៖ ក្រុមហ៊ុន Universal Music ក្រុមហ៊ុន Apple និង ក្រុមហ៊ុន Facebook ក៏ដូចជាសេវាកម្មឌីជីថលនានារួមមាន៖ សេវាធានារ៉ាប់រងជីវិតឆ្លាតវៃ សេវា SmartPay សេវា Pleng by Smart សេវា Pi Pay និងសេវា SmartNas។ ក្រុមហ៊ុន Smart មានចក្ខុវិស័យក្លាយជាក្រុមហ៊ុនលេខ១ និងជាក្រុមហ៊ុនបច្ចេកវិទ្យាទូរគមនាគមន៍ដែលទទួលបានកី្ដស្រលាញ់ពេញចិត្តបំផុតនៅព្រះរាជាណាចក្រកម្ពុជានៅត្រឹមឆ្នាំ២០២២តាមរយៈកម្មវិធីទំនួលខុសត្រូវខ្ពស់លើកិច្ចការងារសង្គមនិងកម្មវិធីនិរន្តរភាពនានាសម្រាប់កំណើនសេដ្ឋកិច្ច និងសង្គមជាតិ។

ក្រុមហ៊ុន Smart មានបុគ្គលិកនិយោជិតសរុបប្រមាណជាង ១.០០០(មួយពាន់) នាក់ ក្នុងនោះរួមបញ្ចូលទាំងនិយោជិតក្នុងស្រុកនិងនិយោជិតបរទេសដែលកំពុងខិតខំប្រឹងប្រែងឆ្ពោះទៅសម្រេចបេសកកម្មរួមគ្នាក្នុងការផ្សារភ្ជាប់និងធ្វើឱ្យជីវិតកាន់តែប្រសើរឡើង។

Smart ជីវិតរស់រវើក!

អានបន្ថែម