QR កូដល្បីខ្លាំង Android 13 អាចនឹងបន្ថែមផ្លូវកាត់មុខងារនេះ ចូលប្រើកាន់តែរហ័ស

បរទេស៖ អស់ពេលជាច្រើនឆ្នាំ មុខងារស្កេន QR កូដមិនត្រូវបានភ្ជាប់មកជាមួយដោយផ្ទាល់ នៅក្នុងស្មាតហ្វូនទេហើយទាមទារឲ្យមានការដំឡើងកម្មវិធីពីខាងក្រៅ។ ដោយសារតែការស្កេន QR កូដកាន់តែមានភាពទូលំទូលាយ ក្រុមហ៊ុន Google ទំនងជានឹងបន្ថែមផ្លូវកាត់ឲ្យកាន់តែប្រសើរឡើងសម្រាប់ដំណើរការនៅលើប្រព័ន្ធប្រតិបត្តិការ Android 13។

រូបភាព Screenshots ដែលគេប្រាប់ថាជា Android 13 ត្រូវបានចែករំលែកដោយគេហទំព័រ Android Policeដោយមានបង្ហាញពីផ្លូវកាត់ថ្មីចំនួនពីរដែលនឹងមកដល់នៅលើប្រព័ន្ធប្រតិបត្តិការថ្មីរបស់ Google ក្នុងពេលខាងមុខ។ ទីមួយត្រូវបានឃើញមាននៅលើរបាមីនុយ Quick Settingsដែលបង្ហាញជម្រើសសម្រាប់អ្នកប្រើប្រាស់ ដើម្បីបើកមុខងារ QR កូដកាន់តែរហ័សប៉ុន្តែនៅក្នុងរូបភាពនេះ វាហាក់ដូចជាមិនទាន់អាចប្រើបាននៅឡើយ។

ទីពីរគឺជាផ្លូវកាត់ដែល Google ហាក់ដូចជាកំពុងបន្ថែមទៅកាន់ Android 13 សម្រាប់ការចូលទៅប្រើ QR កូដ ដោយអាចចូលទៅកំណត់នៅក្នុងកន្លែងlockscreen។ វាអាចបើកដំណើរការផ្លូវកាត់នេះបានដោយចូលទៅក្នុង Settings នៅកន្លែងមីនុយ “Lock Screen” ហើយវានឹងបង្ហាញផ្នែក “Show QR Scanner”។ គេមិនច្បាស់ទេ ថាតើវានឹងដំណើរការជាប៊ូតុងនៅលើផ្ទៃអេក្រង់ចាក់សោរតែម្ដងឬក៏វាគ្រាន់តែអនុញ្ញាតឲ្យអ្នកប្រើ បើកការស្កេន QR កូដ ពីរបាquick settings ស្របពេលទូរសព្ទកំពុងជាប់សោរ។

ក្នុងករណីផ្សេងៗក្រុមហ៊ុន Google អាចធ្វើការផ្លាស់ប្ដូរពីរបៀបគ្រប់គ្រង QRកូដ៕

ប្រភព: 9to5Google