ខំណាស់! កីឡាករ Man UTD រូបនេះ សម្ងំហ្វឹកហាត់ម្នាក់ឯង ក្រោយចប់ការប្រកួតទល់នឹង Liverpool ថ្ងៃមុន (មានវីដេអូ)

អង់គ្លេស៖ Donny van de Beek ដែលបានផ្ទេរពីក្លិប Ajax មកកាន់ក្លិបបិសាចក្រហម Manchester United កំលុងខែសីហាឆ្នាំមុន នៅក្នុងតម្លៃ៤០លានផោន (ឬប្រមាណ៥៥លានដុល្លា) ហាក់មិនទាន់ទទួលបានការពេញចិត្ដ និងស្ថិតក្នុងគម្រោងប្រើប្រាស់របស់លោកគ្រូបង្វឹក Ole Gunnar Solskjaer នៅឡើយ។

ខ្សែបម្រើរូបនេះ ស្ទើរតែមិនត្រូវបានផ្ដល់ឳកាសបង្ហាញខ្លួនទាល់តែសោះ ដោយទើបចូលលេងសរុបបានប្រមាណ១៤០នាទីប៉ុណ្ណោះ នៅរដូវកាលថ្មីនេះ។ ខណៈការប្រកួតដែលក្រុមបិសាចក្រហមរងបរាជ័យក្រោមថ្វីជើង ក្រុមភ្ញៀវហង្សក្រហម Liverpool នៅក្នុងលទ្ធផលយ៉ាងចាស់ដៃរហូតដល់ ៥ ទល់នឹង ០ កាលពីថ្ងៃអាទិត្យកន្លងទៅ រូបគេក៏ស្ថិតក្នុងកៅអីបម្រុងដែរ។

ទោះជាយ៉ាងណា កីឡាករវ័យ២៤ឆ្នាំរូបនេះ នៅតែបន្ដខិតខំហ្វឹកហាត់ ហើយជាក់ស្ដែង វីដេអូមួយបានបែកធ្លាយនៅលើបណ្ដាញសង្គម បានបង្ហាញឲ្យឃើញថា Van de Beek បានចូលទៅរត់ហ្វឹកហាត់ ក្នុងកីឡដ្ឋាន Old Trafford ក្រោយចប់ការប្រកួតទល់នឹង Liverpool ដោយពុំមានវត្ដមានកីឡាករផ្សេងចូលរួមទេ គឺមានតែក្រុមគ្រូបង្វឹកម្នាក់ប៉ុណ្ណោះ៕

ប្រភព៖​ givemesport