Wenger ថាក្រុមទាំងបួននេះមានភាគរយខ្ពស់អាចលើកពាន Euro 2020

June 3, 2021

អង់គ្លេស៖ អតីតគ្រូបង្វឹករបស់ Arsenal គឺលោក Arsene Wenger បាននិយាយថាក្រុមជម្រើសជាតិបារាំងមានភាគរយអាចឈ្នះពានបាល់ទាត់ទ្វីបអឺរ៉ុប ឬហៅកាត់ថា Euro 2020 ដោយជឿជាក់ថាការវិលត្រឡប់មកវិញរបស់ ខ្សែប្រយុទ្ធ Karim Benzema នឹងធ្វើឲ្យបារាំងពង្រឹងផ្នែកប្រយុទ្ធឲ្យកាន់តែមុតស្រួច។

ក្រុមមាន់គកបារាំង ទើបយកឈ្នះ ក្រុមជម្រើសវែលល៍ ៣-០ កាលពីយប់មិញនេះ នឹងត្រូវប៉ះក្រុម ប៊ុលហ្ការី នៅសប្ដាហ៍ក្រោយ ដែលជាជំនួបមិត្តភាពកម្ដៅសាច់ដុំ មុនចូលប្រកួត Euro ជាផ្លូវការខណៈ ក្រុមជម្រើសជាតិបារាំងចាប់ឆ្នោតនៅពូលមរណៈជាមួយក្រុមខ្លាំងៗឯទៀតដូចជា ព័រទុយកាល់ ,អាល្លឺម៉ង់ និងហុងគ្រីជាដើម។

ក្រៅពីនោះលោកក៏បានចង្អុលបង្ហាញដែរថា ក្រុមជម្រើសជាតិផ្សេងទៀតដូចជា ប៊ែលហ្ស៊ិក អង់គ្លេស និងហូឡង់អាចមានសិទ្ធិប្រជែងយកពាននេះបាន។

លោក Arsene Wenger បានថ្លែងប្រាប់ beIN Sport ថា៖

ក្រុមជម្រើសជាតិបារាំងក្លាយជាក្រុមសំណព្វរបស់ខ្ញុំក្នុងការប្រកួតនេះដោយសារហេតុផលច្រើនមែនទែន។ ហេតុផលចម្បងគេនោះគឺពួកគេទើបតែឈ្នះពានបាល់ទាត់ពិភពលោក នៅឯរុស្ស៊ី ហើយម្យ៉ាងទៀតគ្មានក្រុមណាអាចលើកពានទាំងដែលអាយុជាមធ្យមរបស់កីឡាករក្នុងក្រុមគឺ២៨ឆ្នាំឡើយ ប៉ុន្តែបារាំងមើលទៅជាក្រុមនៅក្មេងខ្ចីនៅឡើយ ពួកគេមិនទាន់ដល់កម្រិតកំពូលទេដូច្នេះហើយទើបខ្ញុំគិតថាពួកគេនឹងបន្តឈ្នះពានរង្វាន់ទៀត។ពួកគេក៏មិនទាន់មានកីឡាករណារងរបួសនោះដែរ ហើយការរួមបញ្ចូល Karim Benzema ជាលើកដំបូងបង្អស់ក្នុងកំលុងពេល៥ឆ្នាំមកនេះ នឹងធ្វើឲ្យបារាំងកាន់តែខ្លាំងលើតំបន់ប្រយុទ្ធ។ បើសិនអ្នកសាកស្រមៃមើល៍ថា Mbappe,Benzema, Griezmann និងកីឡាករផ្សេងទៀត គឺខ្ញុំគិតថាវាពិតជាពិសេសណាស់។ដូច្នេះហើយសម្រាប់ខ្ញុំ ខ្ញុំគិតថាក្រុមជម្រើសជាតិបារាំង, ប៊ែលហ្ស៊ិក, អង់គ្លេស និងហូឡង់ជាក្រុមដែលមានឱកាសប្រជែងយកពាន Euro៕
— លោក Arsene Wenger

ប្រភព៖ metro

អានបន្ថែម