អារម្មណ៍ពិត! តារាជួរមុខរបស់ Real Madrid រូបនេះថាមិនចាកចេញពីក្លិបក្នុងនាមជាជនបរាជ័យទេ

June 14, 2021

ប៊ែលស៊ិក៖ កីឡាករ Eden Hazard បាននិយាយថាគេនឹងខិតខំប្រឹងប្រែងលេងបន្តទៀតនៅក្លិបអធិរាជស Real Madrid បើទោះបីជាកំលុងពេលពីរឆ្នាំមកនេះ អាជីពជាកីឡាករបាល់ទាត់របស់គេមិនសូវកាក់កបដូចនៅក្លិបចាស់គឺ Chelsea ក៏ដោយនិងថែមទាំងនិយាយទៀតថា គេគ្មានផ្លូវចាកចេញក្នុងនាមជាជនបរាជ័យទេ ហើយគេនឹងបង្ហាញគ្រប់គ្នាថាគេស័ក្តិសមនឹងពាក់អាវ Real Madrid នៅរដូវកាល ២០២១-២០២២ ខាងមុខនេះ។

Hazard បានផ្ទេរពីទឹកដី Stamford Bridge មក Santiago Bernabeu កាលឆ្នាំ២០១៩ ក្នុងតម្លៃខ្លួនដល់ទៅ១២១លានដុល្លារ ប៉ុន្តែកីឡាករវ័យ៣០ឆ្នាំរូបនេះបែរជារងរបួសញឹកញាប់ និងមិនសូវលេងលេចធ្លោដូចមិត្តរួមក្រុម Karim Benzema នោះឡើយ។

ប៉ុន្តែឥលូវនេះ Hazard បាននិយាយពីអារម្មណ៍ពិតខណៈពេលជួយក្រុមជម្រើសជាតិប៊ែលស៊ិកនៅ Euro 2020 ថា៖

ខ្ញុំនឹងធ្វើជាខ្លួនឯងបានលុះត្រាណាតែខ្ញុំសប្បាយចិត្តលើទៅលាន ដែលនោះវាមិនទាន់បានកើតឡើងទេនារយៈពេលពីរឆ្នាំដែលខ្ញុំស្នាក់នៅ Real Madrid។បើសិនអ្នករងរបួសតែម្ដងឬពីរដងគឺអ្នកអាចស្តារកាយសម្បទាខ្លួនឯងវិញនិងត្រឡប់មកវិញដោយលេងឲ្យល្អជាងមុន តែបើសិនអ្នករងរបួសប្រាំ ប្រាំមួយ ប្រាំពីរដងនោះវាពិតជាពិបាកខាងពង្រឹងផ្លូវចិត្តប៉ុន្តែខ្ញុំនឹងខិតខំបន្ត។ ខ្ញុំមិនដែលគិតចង់ចាកចេញពី Real Madrid ទេ យ៉ាងណាក៏ដោយខ្ញុំមិនចាកចេញក្នុងនាមជាជនបរាជ័យទេ ខ្ញុំគ្រាន់តែចង់បង្ហាញថាខ្ញុំកើតមកដើម្បីធ្វើជាកីឡាកររបស់ Real Madrid ។ពីរឆ្នាំមកនេះវាពិបាកណាស់ ខ្ញុំនៅ Madrid ប៉ុន្តែដូចមិនមែនលេងនៅទីនោះ អ្នកដឹងហើយ...ពួកយើងលេងនៅក្នុងកីឡដ្ឋានដោយគ្មានអ្នកគាំទ្រ ហើយខ្ញុំចុះកុងត្រានេះគឺចង់ឃើញអ្នកគាំទ្រនៅកីឡដ្ឋាន។
— Eden Hazard

គួរបញ្ជាក់ផងដែរថា Eden Hazard បានចូលលេងតែ៤៣ប្រកួតប៉ុណ្ណោះនៅពីររដូវកាលមកនេះ ដោយអាក់ខានមិនបានចូលលេងដល់ទៅ៦០ប្រកួតដោយរកបានតែ៥គ្រាប់ និងបញ្ជូនបាល់៦គ្រាប់ប៉ុន្តែគេបានឈ្នះពាន La Liga នៅរដូវកាលមុនជាមួយក្លិប៕

ប្រភព៖ goal

អានបន្ថែម