Neville ថាលោករំជួលចិត្តណាស់ ពេលឃើញទឹកភ្នែកខ្សែប្រយុទ្ធម្នាក់នេះ

December 13, 2022

អឺរ៉ុប៖ លោក Gary Neville បាននិយាយថា វាពិតជារំជួលចិត្តណាស់ពេលឃើញ Cristiano Ronaldo បានសម្រក់ទឹកភ្នែក ក្រោយព័រទុយកាល់ ធ្លាក់ចេញពីការប្រកួតបាល់ទាត់ពិភពលោកត្រឹមវគ្គ៨ក្រុម។

ព័រទុយកាល់ បានចាញ់ ម៉ារ៉ុក ១ ទល់នឹង ០ ដែលធ្វើឲ្យភាគីរបស់លោក Fernando Santos ត្រូវហាលអាវត្រឹមនេះ ខណៈដែលប្រធានក្រុម Ronaldo ត្រូវបានប្ដូរចូលលេងនៅតង់ទី២ទៅហើយ។

ក្រោយអាជ្ញាកណ្ដាលផ្លុំកញ្ចែបញ្ចប់ការប្រកួត គេបានប្រទះឃើញថា Ronaldo បានដួលចុះយំបង្ហាញភាពសោកស្តាយ មុននឹងរូតរះដើរចេញពីទីលានទាំងលើកដៃខ្ទប់មុខ ដែលរូបភាពនោះបានចែកចាយពេញបណ្ដាញសង្គម។

Neville ឯណេះវិញបាននិយាយថា៖

ខ្ញុំចង់និយាយពី Cristiano Ronaldo ព្រោះខ្ញុំបានឃើញរូបភាពគេយំដើរចូលទៅខាងក្នុង។ នោះជារូបភាពដ៏រំជួលចិត្តមួយសម្រាប់ខ្ញុំ ដែលនោះជាពេលដែលគេដឹងថាក្ដីសុបិនឈ្នះបាល់ទាត់ពិភពលោកឲ្យប្រទេសគេបានកន្លងផុតទៅហើយ។ ពួកយើងធ្លាប់ជួបនឹងរឿងបែបនេះដែរពេលជិតបញ្ចប់អាជីព ប៉ុន្តែគេជាកីឡាករដ៏អស្ចារ្យម្នាក់ បើមិនអ៊ីចឹងទេគឺជាកីឡាករដ៏ល្អផ្ដាច់គេម្នាក់គ្រប់ពេលវេលា។ វាពិតជារំជួលចិត្តដែលឃើញគេបែបនោះ។ គេពិតជារងទុក្ខលំបាកប៉ុន្មានខែមកហើយ។
— លោក Gary Neville

ប្រភព៖ metro

ដៃគូរសហការ One Football

អានបន្ថែម