ខំប្រឹងឡើង! បើសិនអាចលើកពាន Euro បាន ក្រុមជម្រើសជាតិអង់គ្លេសនឹងទទួលបានប្រាក់រង្វាន់លើកទឹកចិត្តរហូតដល់ទៅ...

អង់គ្លេស៖ក្រុមជម្រើសជាតិអង់គ្លេសទាំងមូល នឹងទទួលបានប្រាក់រង្វាន់ចំនួន ១២លានផោន(ស្មើនឹងប្រមាណ១៦.៩លានដុល្លារ)បើសិនពួកគេអាចលើកពាន Euro 2020 បាន។

ប៉ុន្តែក្រុមតោកំណាចរបស់លោកគ្រូបង្វឹក Gareth Southgate ត្រូវរង់ចាំរហូតដល់រដូវស្លឹកឈើជ្រុះទើបអាចទទួលបានប្រាក់រង្វាន់នោះដោយសារតែធនាគារអង់គ្លេសបានចេញច្បាប់ទាក់ទងនឹងកម្ចីទៅកាន់សហព័ន្ធកីឡាបាល់ទាត់អង់គ្លេស។

ទឹកប្រាក់សរុបជាង១៦លានដុល្លារនេះនឹងត្រូវចែកកីឡាករក្នុងក្រុមដោយក្នុងម្នាក់អាចទទួលបាន ៦សែន៥ម៉ឺនដុល្លារ ដែលចំនួននេះច្រើនជាង កាលដែលក្រុមជម្រើសជាតិអង់គ្លេសទទទួលបានពេលឡើងមកដល់វគ្គពាក់កណ្ដាលផ្ដាច់ព្រ័ត្របាល់ទាត់ពិភពលោកឆ្នាំ២០១៨ ដែលកីឡាករទទួលបានម្នាក់ តែ៣ម៉ឺនដុល្លារប៉ុណ្ណោះ។

ក្រៅពីនោះ គ្រប់កីឡាករជម្រើសជាតិអង់គ្លេសទាំងអស់នឹងទទួលបានថ្លៃចូលប្រកួតម្នាក់ ២០០០ផោន(ស្មើនឹងប្រមាណ២៨០០ផោន) ក្នុងមួយប្រកួតប៉ុន្តែប្រាក់ទាំងអស់នោះមិនបានដល់ដៃកីឡាករឡើយគឺយកទៅបរិច្ចាគតាមកម្មវិធីសប្បុរសធម៌នានា។

ប្រាក់រង្វាន់ដែលកីឡាករទទួលបាននេះចាត់ទុកថាជាតួលេខខ្ពស់បំផុតសម្រាប់ក្រុមជម្រើសជាតិអង់គ្លេសបន្ទាប់ពី UEFA ឬ សហព័ន្ធកីឡាបាល់ទាត់ទ្វីបអឺរ៉ុប បានប្រកាសថាម្ចាស់ជ័យលាភី Euro 2020 នេះនឹងទទួលបានដល់ទៅ ៣៩៣លានផោន(ស្មើនឹងប្រមាណ៥៥៦លានដុល្លារ)ឯណោះដែលច្រើនជាងកាលឆ្នាំ២០១៦ ដល់ទៅ ២៤ភាគរយ។

គួរបញ្ជាក់ផងដែរថាអ្នកឈ្នះក្នុងការប្រកួតនីមួយៗនឹងទទួលបានប្រាក់ចំនួន៣០លានផោន(ស្មើនឹងប្រមាណ ៤២លានដុល្លារ) ប៉ុន្តែខាងសហព័ន្ធកីឡាបាល់ទាត់អង់គ្លេសនឹងរក្សាទុកប្រាក់ចំនួន៦០ភាគរយ ឯ៤០ភាគរយនឹងកាត់ទៅឲ្យកីឡាករក្នុងក្រុម។

អ្វីដែលកាន់ពិសេស គឺ គ្រប់ក្រុមក្នុងការប្រកួត Euro ដែលបានឡើងមកដល់វគ្គចែកពូលនេះគឺទទួលបាន៨.៥លានផោន(ស្មើនឹងប្រមាណ១២លានដុល្លារ)រួចជាស្រេចទៅហើយ៕

ប្រភព៖​ thesun