Barca ដាច់ចិត្តបញ្ចេញកីឡាកររបស់ខ្លួន២នាក់នេះដោយឥតគិតថ្លៃ ដើម្បីសន្សំប្រាក់ផ្គត់ផ្គង់ប្រាក់ខែជូន Messi

អឺរ៉ុប៖ ក្លិប Barcelona បានត្រៀមរួចជាស្រេចក្នុងការអនុញ្ញាតឱ្យកីឡាករMiralem Pjanic និង Samuel Umtiti ចាកចេញនៅក្នុងរដូវក្តៅនេះដោយឥតគិតថ្លៃ ខណៈនេះគឺជាផ្នែកមួយដែលពួកគេអាចរក្សាកីឡាករLionel Messi ទុកបានផងដែរ។

ជាការពិតណាស់ Messi បច្ចុប្បន្នគឺបានក្លាយជាកីឡាករដែលអាចផ្ទេរចេញដោយគ្មានតម្លៃខ្លួនបន្ទាប់ពីកុងត្រារបស់គាត់ផុតកំណត់ជាមួយ Barca កាលពីអាទិត្យមុន។

ទោះបីជាយ៉ាងណាក៏ដោយ Barcelonaនៅតែសង្ឃឹមថា ពួកគេនឹងអាចបញ្ចុះបញ្ចូលខ្សែប្រយុទ្ធកំពូលរូបនេះឱ្យចុះកុងត្រាថ្មីបានប៉ុន្តែក្នុងនោះពួកគេគឺត្រូវការទឹកប្រាក់ប្រមាណជា ២០០ លានអឺរ៉ូ ឬស្មើនឹង (២៣៧លានដុល្លាអាមេរិក) ជាចាំបាច់ ដើម្បីផ្គត់ផ្គង់តាមសំណើដែលខ្សែប្រយុទ្ធសញ្ជាតិអាហ្សង់ទីនរូបនេះចង់បាន។

ដូច្នេះ Barcelona ត្រូវតែពន្លឿនផ្លាស់ប្តូរកីឡាកររបស់ខ្លួនចេញមួយចំនួនឱ្យបានឆាប់នៅក្នុងរដូវក្តៅនេះ មិនថាតែ Umtiti និង Pjanic នោះទេជារួមឱ្យតែកីឡាករណាដែលនៅក្រៅពីគម្រោងរបស់លោក Ronald Koeman គឺត្រូវបញ្ចេញទាំងអស់។

យោងតាមរបាយការណ៍របស់កាសែត MundoDeportivo បានឱ្យដឹងថា ក្លិប Barcelona បានត្រៀមរួចរាល់ហើយក្នុងការអនុញ្ញាតឱ្យ Umtiti និង Pjanic ដើរចេញពីទឹកដី CampNou ដោយគ្មានតម្លៃខ្លួន ខណៈជម្រើសបែបនេះគឺដោយសារតែ Barcaចង់កាត់បន្ថយការចំណាយប្រាក់ឈ្នួលរបស់កីឡាករ៕

ប្រភព៖​ Metro