កីឡាករមិនសូវបង្ហាញមុខរបស់ Barca រូបនេះទំនងជាផ្ទេរទៅ West Ham ឬ Southampton

អេស្ប៉ាញ៖ ខ្សែការពារ Junior Firpo នៃក្លិបអ្នកមានបុណ្យ Barcelona ត្រូវបានគេរាយការណ៍ថាជិតនឹងផ្ទេរទៅក្លិប West Ham ឬ Southampton ហើយខណៈដែលក្លិបទាំងពីរនេះបានចូលខ្លួនចរចាទិញយករូបគេ។

Barcelona បានដាក់តម្លៃខ្លួន Firpo ខ្ទង់១៤លានផោន(ស្មើនឹងប្រមាណ១៩.៧លានដុល្លារ) បន្ទាប់ពីគេមិនសូវបានបង្ហាញមុខក្រោមការដឹកនាំរបស់លោកគ្រូបង្វឹក Ronald Koeman។

កីឡាករវ័យ២៤ឆ្នាំរូបនេះ ផ្ទេរមកពីក្លិប Real Betis មក Barcelona ប៉ុន្តែគេមិនអាចប្រជែងជាមួយរាមច្បងដទៃក្នុងការដណ្ដើមយកតំណែងជម្រើស១១នាក់ដំបូងឡើយទើបក្លិបចាំបាច់ត្រូវលក់គេចេញដើម្បីយកប្រាក់មកទិញកីឡាករបន្ថែម ដោយពេលនេះWest Ham និង Southampton សុទ្ធតែចាប់អារម្មណ៍ទិញយក Junior Firpo។

កន្លងមកមានក្លិបជាច្រើននៅអ៊ីតាលីចង់ខ្ចីជើងរូបគេប៉ុន្តែ Barcelona បានបដិសេធដោយចង់លក់គេផ្ដាច់តែម្ដង ឯ ខ្លួនគេផ្ទាល់ក៏ចង់ចាកចេញពី Camp Nou ទៅស្វែងរកការប្រកួតប្រជែងថ្មីផងដែរ។

កីឡាករសញ្ជាតិអេស្ប៉ាញ-ដូមិនីក រូបនេះបង្ហាញខ្លួនបានតែ១៨ប្រកួតគត់ និងរកបាន១គ្រាប់ព្រមទាំងបញ្ជូនបាល់១គ្រាប់ទៀត៕

ប្រភព៖​ dailymail