ល្អណាស់! អាយុតែ១៨ឆ្នាំទេតែ Pedri តាមស្មើកំណត់ត្រាមួយរបស់ Bruno

អឺរ៉ុប៖ ខ្សែបម្រើ Pedri Gonzalez នៃក្លិប Barcelona កំពុងជួយក្រុមជម្រើសជាតិអេស្ប៉ាញលេងនៅព្រឹត្តិការណ៍ អូឡាំពិក ឆ្នាំ២០២០នៅឯប្រទេសជប៉ុន ហើយមកទល់ពេលនេះគេបានតាមស្មើកំណត់ត្រារបស់ខ្សែបម្រើ Bruno Fernandes នៃក្លិបបិសាចក្រហម Manchester United ក្នុងការបង្ហាញខ្លួនបាន៧២ប្រកួតក្នុងមួយរដូវកាល។

Bruno Fernandes បានបំបែកកំណត់ត្រាក្លាយជាកីឡាករដែលចូលលេងបានច្រើនជាងគេក្នុងមួយរដូវកាល ប៉ុន្តែឥលូវនេះដោយសារ Pedri បានចូលលេងនៅ Barcelona ផង, ព្រឹត្តិការណ៍ Euro 2020 និងព្រឹត្តិការណ៍អូឡាំពិកឆ្នាំ២០២០ ផងទើបធ្វើឲ្យគេឈានដល់ការតាមស្មើកំណត់ត្រាកីឡាករសញ្ជាតិព័រទុយកាល់បែបនេះ។

នៅអាយុត្រឹមតែ១៨ឆ្នាំ Pedri បានចូលលេងឲ្យ Barcelona នៅរដូវកាលនេះសរុបចំនួន៥២ប្រកួត និងបានលេង២០ប្រកួតនៅក្រុមជម្រើសជាតិអេស្ប៉ាញបើគិតទាំងព្រឹត្តិការណ៍ Euro 2020 និងអូឡាំពិក ២០២០ ។

បើសិន Pedri មិនរងរបួសឬអាក់ខានចូលប្រកួតវគ្គផ្ដាច់ព្រ័ត្រនៅអូឡាំពិក គឺមានន័យថា គេនឹងបំបែកកំណត់ត្រារបស់ Bruno Fernandes ក្លាយជាកីឡាករដែលលេងបានច្រើនប្រកួតជាងគេខណៈ អេស្ប៉ាញ បានឡើងទៅលេងវគ្គផ្ដាច់ព្រ័ត្រនៅ អូឡាំពិក ក្រោយបំបាក់ជប៉ុន១ ទល់នឹង ០ ៕

ប្រភព៖​ marca