ឲ្យតែព្រមមក! ប្រធានក្លិប Spurs គ្រោងនឹងចាយប្រាក់ឲ្យ Conte ក្នុងមួយឆ្នាំរហូតដល់ទៅ...

អង់គ្លេស៖ យោងតាមសេចក្ដីរាយការណ៍គឺ លោកគ្រូបង្វឹក Antonio Conte បានក្លាយជាគោលដៅចម្បងគេរបស់ ក្លិបមាន់ខ្នាយមាស Tottenham Hotspur បន្ទាប់ពី អតីតគ្រូបង្វឹក Mauricio Pochettino ដែលដឹកនាំនៅ PSG ទំនងជាមិនអាចផ្ទេរមកដឹកនាំក្លិបចាស់វិញបាន។

យ៉ាងណាមិញ ម្ចាស់ក្លិប Spurs គឺ Daniel Levy គ្រោងនឹងបោះប្រាក់យ៉ាងច្រើនសន្ធឹកសន្ធាប់ដល់លោកគ្រូ Conte បើសិនលោកគ្រូយល់ព្រមមកដឹកនាំ ដោយទទួលបានដល់ទៅ ១៥លានផោន(ស្មើនឹងប្រមាណ២១.១លានដុល្លារ) ក្នុងមួយឆ្នាំ នេះយោងតាមសារព័ត៌មាន The Mirror ។

បើលោកគ្រូព្រមទទួលការងារនេះ ចំនួនទឹកប្រាក់មហាសាលនេះនឹងអាចធ្វើឲ្យលោកគ្រូក្លាយជាគ្រូបង្វឹកទី២ដែលទទួលបានប្រាក់ឈ្នួលខ្ពស់បំផុតនៅក្របខណ្ឌ Premier League ខណៈដែលគ្រូបង្វឹកដែលរកប្រាក់ឈ្នួលបានច្រើនបំផុតនៅ PL ពេលនេះគឺ លោកគ្រូ Pep Guardiola នៃក្លិប Manchester City ដោយលោកគ្រូទទួលបានដល់ទៅ២០លានផោន(ស្មើនឹងប្រមាណ២៨.២លានដុល្លារ)។

លោកគ្រូបង្វឹក Jurgen Klopp នៃក្លិបហង្សក្រហម Liverpool ឯណោះវិញក៏ទទួលបានប្រាក់ឈ្នួល១៥លានផោន(ស្មើនឹងប្រមាណ ២១.១លានដុល្លារ) ដែរដោយធ្លាប់ដឹកនាំឲ្យក្លិបឈ្នះពាន Premier League និង Champions League។

ប៉ុន្តែ គេមិនទាន់ដឹងទេថាលោកគ្រូបង្វឹក Antonio Conte ព្រមមកដឹកនាំ Spurs ឬយ៉ាងណានោះឡើយ ព្រោះលោកគ្រូចង់ឲ្យប្រាកដចិត្តថាក្លិបពិតជាមានឆន្ទៈទិញយកកីឡាករថ្មីៗតាមដែលលោកគ្រូស្នើសុំពិតមែន៕

ប្រភព៖​ thesun