ចំៗហ្មង! ជើងចាស់ Evra ថាការចាកចេញរបស់ Ronaldo ធ្វើឱ្យកីឡាករ Man UTD រូបនេះឡើងជើងខ្លាំង

January 8, 2023

បរទេស៖ អតីតខ្សែការពារស្លាបឆ្វេងរបស់ Manchester United លោក Patrice Evra បានមានប្រសាសន៍ថា ការចាកចេញរបស់ខ្សែប្រយុទ្ធឆ្នើម Cristiano Ronaldo គឺបានធ្វើឱ្យ Bruno Fernandes បង្ហាញសមត្ថភាពបានល្អជាងមុនខ្លាំងគួរឱ្យកត់សម្គាល់។

តាមរយៈស្ថានភាពជាក់ស្តែង យើងឃើញថា Bruno ពិតជាបង្ហាញទម្រង់លេងបានល្អពិតមែន ចាប់តាំងពី Ronaldo ចាកចេញពីទឹកដី Old Trafford ផ្លាស់ទៅកាន់ក្លិប Al-Nassr ខណៈនៅរដូវកាលនេះខ្សែបម្រើប្រយុទ្ធវ័យ ២៨ ឆ្នាំ គឺរកបាន ៣ គ្រាប់ និង assist ចំនួន ៥ លើកផងដែរ ក្នុងចំណោមការបង្ហាញខ្លួន ២៥ ប្រកួតកន្លងមក។

ទាក់ទងនឹងរឿងខាងលើ, លោក Evra បានមានប្រសាសន៍ប្រាប់ទំព័រ Betfair យ៉ាងដូច្នេះថា៖

ខ្ញុំមិនចង់និយាយអំពីរឿងអតីតកាលទេ, ប៉ុន្តែអ្នកអាចមើលឃើញផ្ទាល់ភ្នែក ថាក្រុម និងលោក Ten Hag ឥឡូវគឺពិតជារីករាយណាស់, គ្រប់យ៉ាងគឺពោពេញដោយភាពអវិជ្ជមាននៅជុំវិញក្លិបជាមួយករណីរបស់ Cristiano Ronaldo ហើយនិងរឿងជាច្រើនទៀត, ដែលឥឡូវគឺវាបានបញ្ចប់ហើយ។
— លោក Patrice Evra

លោក Evra បានបន្ថែមទៀតថា៖

ខ្ញុំតែងតែលើកឧទាហរណ៍អំពី Bruno Fernandes, អ្នកគាំទ្រគឺធ្លាប់បានរិះគន់គាត់ និយាយថាគាត់គឺបង្ហាញទម្រង់លេងមិនបានល្អ ដូចនឹងពេលដែលគាត់ទើបតែចុះកុងត្រាជាមួយក្លិបដំបូង។ នេះមិនមែនជាការដាក់បន្ទុកភាពអវិជ្ជមានទៅលើ Ronaldo ទេ, ប៉ុន្តែ Bruno Fernandes គាត់អាចបង្ហាញទម្រង់លេងបានល្អមកវិញ លុះត្រាតែគាត់ក្លាយជាអ្នកដឹកនាំដ៏ពិតប្រាកដម្នាក់៕
— លោក Patrice Evra

ប្រភព៖ Sportskeeda

ដៃគូរសហការ One Football

អានបន្ថែម