កប់បាត់! Lewandowski ថា គេចង់ទៅចូលរួមជាមួយក្លិបយក្សនៅ La Liga មួយនេះ នៅរដូវក្តៅខាងមុខ

បរទេស៖ យោងទៅតាមរបាយការណ៍បានឲ្យដឹងថា ខ្សែប្រយុទ្ធឆ្នើមរបស់ Bayern Munich កីឡាករ Robert Lewandowski សារភាពថា គេចង់ចូលរួមជាមួយ Barcelona នៅរដូវក្តៅខាងមុខ។

ជាការពិតណាស់ កុងត្រារបស់ Lewandowski ជាមួយ Bayern នឹងត្រូវផុតកំណត់នៅឆ្នាំ២០២៣ ទេ ក៏ប៉ុន្តែមានរបាយការណ៍ជាច្រើនបានបង្ហាញថាគេកំពុងតែចង់ផ្លាស់ចេញពីក្លិបឆាប់ៗនេះ។ លើសពីនេះផងដែរ ក្លិប Bayern កំពុងតែតាមចងជើង Lewandowski ដូចគ្នា ក៏ប៉ុន្តែ ដោយសារការចរចាគ្នាពុំត្រូវ ទើបធ្វើឲ្យខ្សែប្រយុទ្ធឆ្នើមខាងលើ ប្តូរចិត្តចង់រកទ្រនំថ្មី ស្របពេលដែល ក្លិប Barca កំពុងតាមចែចូវគេ យ៉ាងស្អិតរមួតផងដែរ។

បើយោងទៅតាមសារកាសែត Sky in Germany បានចុះផ្សាយឲ្យដឹងថា Lewandowski បានបដិសេធមិនព្រមចុះកុងត្រាថ្មីជាមួយ Bayern ឡើយ ហើយលើសពីនេះផងដែរ គេក៏កំពុងតែអន្ទះសារចង់ចូលរួមជាមួយ Barca នៅរដូវក្តៅខាងមុខនេះតែម្តង ដោយគេមិនចង់ចាំរហូតដល់គេក្លាយជាកីឡាករដែលគ្មានតម្លៃខ្លួននោះទេ៕

ប្រភព៖​ skysports