ឲ្យតែគ្រូ Tuchel ធានាដាក់ចូលលេងទៀងទាត់ កីឡាករ Man City ម្នាក់នេះសុខចិត្តផ្លាស់ទៅ Chelsea ភ្លាម

អង់គ្លេស៖ ខ្សែប្រយុទ្ធ Raheem Sterling នៃក្លិប Manchester City នឹងផ្លាស់ទៅចូលរួមជាមួយក្លិប Chelsea បើសិនលោក Thomas Tuchel សន្យាថានឹងឲ្យគេបានចូលលេងក្នុងក្រុមយ៉ាងទៀងទាត់។

Chelsea ត្រូវបានគេរាយការណ៍ថានឹងដាក់សំណើទឹកប្រាក់ខ្ទង់ ៦០លានផោន(ស្មើនឹងប្រមាណ ៧៣.៨ លានដុល្លារ)ទិញយកកីឡាករសញ្ជាតិអង់គ្លេសរូបនេះខណៈដែល Sterling នឹងអស់សុពុលភាពកុងត្រាស្នាក់នៅទឹកដី Etihad នារដូវក្ដៅឆ្នាំក្រោយនេះហើយ។

Sterling ធ្លាប់ចង់ផ្លាស់ទៅលេងនៅប្រទេសអេស្ប៉ាញដូចជា Barcelona និង Real Madrid ប៉ុន្តែការផ្ទេរនោះមិនកើតឡើងទេដូច្នេះទើបគេសម្លឹងចង់ផ្លាស់ទៅក្លិបផ្សេងនៅក្របខណ្ឌ Premier League ដដែល។

Raheem Sterling បានជាប់ជម្រើស១១នាក់ដំបូងចំនួន៣២ប្រកួតនៅរដូវកាលមុន ខណៈដែលគេពុំបានចូលលេងក្នុងការប្រកួតវគ្គពាក់កណ្ដាលផ្ដាច់ព្រ័ត្រ Champions League ទល់នឹង Real Madrid នោះឡើយ។

Chelsea ឯណោះវិញចង់បាន Sterling មកពង្រឹងតំបន់ប្រយុទ្ធស្របពេលអនាគតកីឡាករមួយចំនួនដូចជា Hakim Ziyech, Romelu Lukaku និង Christian Pulisic មានភាពមិនច្បាស់លាស់៕

ប្រភព៖​ metro