ក្លិបណា? បើចាកចេញពី Man UTD មែន Ronaldo មានភាគរយខ្ពស់នឹងផ្ទេរទៅក្លិបមួយនេះ

អឺរ៉ុប៖ ថ្មីៗនេះមានព័ត៌មានលេចឮថា ខ្សែប្រយុទ្ធ Cristiano Ronaldo បានពិភាក្សាជាមួយភ្នាក់ងាររបស់គេគឺលោក Jorge Mendes ដើម្បីរកដំណោះស្រាយថាត្រូវចាកចេញពីក្លិប Manchester United ឬយ៉ាងណា ព្រោះការដឹកនាំរបស់លោក Ralf Rangnick ហាក់មិនត្រូវជាមួយនឹងអ្វីដែលគេចង់បាន។

ស្រាប់តែឥលូវនេះ ក្លិប Paris Saint-Germain ត្រូវបានគេរាយការណ៍ថាកំពុងចង់ដាក់សំណើទិញយក កីឡាករសញ្ជាតិព័រទុយកាល់រូបនេះដើម្បីយកមកជំនួស Kylian Mbappe ដែលអស់កុងត្រានៅបញ្ចប់រដូវកាលនេះហើយ។

នេះមិនមែនជាលើកដំបូងទេដែល PSG ដាក់ការចាប់អារម្មណ៍ចង់បាន Ronaldo ព្រោះកាលពីរដូវក្ដៅឆ្នាំមុន ក្លិបក៏ចង់បានគេម្ដងរួចមកហើយ។

សារព័ត៌មាន Marca បានចុះផ្សាយថា បើសិន Cristiano Ronaldo សម្រេចចិត្តចែកផ្លូវជាមួយ Man UTD នោះក្លិបតែមួយគត់ដែលគេនឹងផ្ទេរទៅគួរតែជា PSG ព្រោះ ខ្សែប្រយុទ្ធវ័យ៣៦ឆ្នាំរូបនេះពុំធ្លាប់បានលេងនៅលីគ Ligue 1 ឯប្រទេសបារាំងនោះឡើយ។

បើបានផ្ទេរមកមែន Ronaldo នឹងចាប់ដៃគូនៅតំបន់ប្រយុទ្ធជាមួយគូប្រជែងឆ្នើម Lionel Messi ដែលទើបនឹង​​ផ្ទេរទៅ PSG នៅ​​​រដូវក្ដៅឆ្នាំ២០២១៕

ប្រភព៖​ marca