ស៊ុតច្បាស់ៗណាស់! អ៊ីតាលី លត់ តួកគី ៣-០ ក្នុងថ្ងៃបើកឆាកពាន Euro (មានវីដេអូ)

អ៊ីតាលី៖ ការប្រកួត ព្រឹត្តិការណ៍ Euro2020 បានចាប់ផ្ដើមប្រារព្ធឡើង កាលពីរាត្រីថ្ងៃសុក្រម្សិលមិញនេះ ដោយក្រុមអ៊ីតាលីធ្វើបានយ៉ាងល្អក្នុងថ្ងៃបើកឆាក ពោលគឺបានលត់ក្រុម តួកគី នៅក្នុងទឹកដីខ្លួនឯងកីឡដ្ឋាន Stadio Olimpico ទីក្រុងរ៉ូមដោយលទ្ធផល ៣ទល់នឹង០ ។

បើមើលទៅលើស្ថិតិនៃការប្រកួត ឃើញថាអ៊ីតាលី ពិតធ្វើបានល្អ ហួសពីការស្មាន តួយ៉ាងពួកគេគ្រប់គ្រងបាល់បានដល់ទៅ៦១ភាគរយបង្កើតឱកាសស៊ុតបាន១៦ជើង ចំគោលដៅ៨ដង ចំណែកឯក្រុមតួកគីវិញ ស៊ុតសរុបបាន២ជើងប៉ុណ្ណោះចំគោលដៅ១ដង។

ក្នុងនោះដែរ ៣គ្រាប់របស់ក្រុមអ៊ីតាលី​ ដែលដឹកនាំដោយលោកគ្រូ Roberto Mancini រកបានដោយការភ្លាត់ធ្វើឲ្យចូលទីខ្លួនឯងរបស់ខ្សែការពារក្រុមតួកគីកីឡាករ Merih Demiral នៅនាទីទី៥៣ និងការស៊ុតរបស់ខ្សែប្រយុទ្ធCiro Immobile នៅនាទីទី៦៦ ខណៈគ្រាប់ទី៣ដែលជាគ្រាប់ចុងក្រោយបញ្ចប់ទីដោយកីឡាករ Lorenzo Insigne នៅនាទីទី៧៩។

តាមរយៈជ័យជម្នះនេះ បានជួយ អ៊ីតាលីឡើងទៅឈរលេខ១ ក្នុងពូល A ជាបណ្ដោះអាសន្នដោយរកបាន៣ពិន្ទុ ក្នុងដៃ៕

បើចង់ជ្រាបច្បាស់ថាការប្រកួតជក់ចិត្តយ៉ាងណានោះ សូមទស្សនាវីដេអូខាងក្រោម៖