ចុមយក្ស! លេចឮថាលោក Zidane បានបដិសេធការងារជាមួយក្រុមចំនួន ៥ ដោយសារតែលោកចង់ទៅដឹកនាំក្រុមមួយនេះ

បរទេស៖ យោងតាមសារព័ត៌មាន L'Equipe បានឱ្យដឹងថាលោក Zinedine Zidane បានបដិសេធការងារជាមួយក្រុមចំនួន ៥ ដូចជាក្រុមជម្រើសជាតិ ព័រទុយកាល់, ប្រេស៊ីល, អាមេរិក, កាតា និង អារ៉ាប់រួម ដោយសារតែលោកមានគោលដៅចង់ទៅដឹកនាំក្រុម Juventus។

ជាការពិតណាស់ ចាប់តាំងពីលោក Zidane ចាកចេញពី Real Madrid នៅឆ្នាំ ២០២១ ពេលនេះគឺលោកមិនទាន់មានការងារធ្វើនោះទេ, ខណៈបំណងដែលលោកចង់ក្លាយគ្រូបង្វឹករបស់ក្រុមជម្រើសជាតិ បារាំង ក៏ត្រូវបានបរាជ័យផងដែរ បន្ទាប់ពីគ្រូបង្វឹករបស់ក្រុមមាន់គកបច្ចុប្បន្នលោក Didier Deschamps ត្រូវបានបន្តកុងត្រាថ្មី។

ទោះបីជាយ៉ាងណាក៏ដោយ ក៏មានក្រុមជាច្រើនទៀតបានទាក់ទងចង់បានលោកយកទៅដឹកនាំផងដែរ ប៉ុន្តែជារឿយៗលោកបានបដិសេធ ដោយសារតែគោលដៅបន្ទាប់លោកចង់ក្លាយជាគ្រូបង្វឹករបស់ Juventus ជំនួសលោក Massimiliano Allegri ដែលជាគ្រូបង្វឹកបច្ចុប្បន្ន។

គួរបញ្ជាក់ថា ស្ថានភាពរបស់លោក Allegri ជាមួយ Juventus បច្ចុប្បន្នក៏មិនសូវល្អនោះដែរ ដោយឥឡូវនេះនៅក្នុងក្របខណ្ឌ Serie A ក្រុមរហស្សនាមសេះបង្កង់ កំពុងធ្លាប់ទៅឈរនៅលេខរៀងទី ១០ ឯណោះ ហើយទើបតែមាន ២២ ពិន្ទុប៉ុណ្ណោះ៕

ប្រភព៖​ Sportskeeda