Arsenal នឹងឡើងសង្វៀនដណ្ដើមតារាឆ្នើមនៅ At. Madrid រូបនេះជាមួយ Man UTD

អង់គ្លេស៖ យោងតាមសេចក្ដីរាយការណ៍ ក្លិបកាំភ្លើងធំ Arsenal នឹងចូលប្រជែងដណ្ដើមទិញយក ខ្សែការពារ Kieran Trippier នៃក្លិប Atletico Madrid ខណៈដែល Manchester United ក៏ត្រូវបានគេរាយការណ៍ថាចង់បាន Trippier ណាស់ដែរ។

ប៉ុន្តែ Arsenal បានបង្កើតសំណើគួរឲ្យទាក់ចិត្តមួយគឺ សុខចិត្តឲ្យខ្សែការពារ Hector Bellerin ទៅ Atletico Madrid ជាផ្នែកមួយនៃសំណើបើសិនក្លិប ព្រមលក់ Trippier មកឲ្យពួកគេ។

កីឡាករវ័យ៣០ឆ្នាំរូបនេះបានរួមចំណែកជួយ Atletico Madrid លើកពាន La Liga កាលពីខែឧសភាកន្លងទៅនិងបានក្លាយជាតារាឆ្នើមម្នាក់ក្រោមការដឹកនាំរបស់លោកគ្រូបង្វឹក Diego Simeone ផងដែរ។

Manchester United ឯណោះវិះបានបើកការចរចាជាមួយ At. Madrid ទាក់ទងនឹងរឿងទិញយក Trippier ដែលត្រូវបានគេរាយការណ៍ថារូបគេបានប្រាប់មិត្តរួមក្រុមនៅជម្រើសជាតិអង់គ្លេសថាចង់ផ្ទេរមកទឹកដី Old Trafford និងថែមទាំងស្វែងរកផ្ទះនៅក្រុង មេនឆេសស្ទ័រ ទៀតផង។  

សារព័ត៌មាន Marca បានបង្ហើបថា Arsenal ក៏ចង់បាន Kieran Trippier ណាស់ដែរនិងសុខចិត្តយក Bellerin មកប្ដូរ ខណៈ ប្រធានផ្នែកកីឡារបស់ Atletico Madrid គឺលោក Andrea Berta ពេញចិត្តនឹងអតីតខ្សែការពាររបស់ Barcelona រូបនេះណាស់។

យ៉ាងណាមិញ  នៅសល់កុងត្រាដល់ទៅពីរឆ្នាំទៀតឯណោះនៅ Atletico Madrid បន្ទាប់ពីផ្ទេរពីក្លិប Tottenham Hotspur មកកាន់ ទឹកដី Wanda Metropolitano ក្នុងតម្លៃខ្លួន២០លានផោន(ស្មើនឹងប្រមាណ២៨.២លានដុល្លារ)នៅឆ្នាំ២០១៩៕

ប្រភព៖​ metro