លោក Pochettino កំពុងត្រូវបានក្លិបនៅអេស្ប៉ាញ ក្រវែលៗចង់បាន បន្ទាប់ពីត្រូវចែកផ្លូវជាមួយ PSG

អេស្ប៉ាញ៖ យោងតាមសេចក្ដីរាយការណ៍បានឲ្យដឹងថា លោក Mauricio Pochettino កំពុងជាគោលដៅរបស់ក្លិប Athletic Bilbao ។

អតីតគ្រូបង្វឹកក្រុមមាន់ខ្នាយមាស Tottenham Hotspur រូបនេះ នឹងត្រូវបានក្លិប Paris Saint-Germain បញ្ចប់តួនាទី បន្ទាប់ពីឆ្លងកាត់ការប្រជុំផ្ទៃក្នុងកាលពីសប្ដាហ៍មុន។

ជាមួយគ្នានេះ ដំណឹងពីការចែកផ្លូវរបស់លោក Pochettino បាននាំឲ្យមានភាពស្រពេចស្រពិល ថាលោកគ្រូ នឹងត្រូវបន្តទៅក្លិបណាបន្ទាប់​ ខណៈក្លិប Athletic Bilbao ជាក្លិបមួយកំពុងមានដំណឹងពាក់ព័ន្ធនឹងគ្រូបង្វឹកសញ្ជាតិអាហ្សង់ទីនរូបនេះ។

យ៉ាងណាមិញ ការផ្លាស់ទៅដឹកនាំនៅ Athletic Bilbao​ កើតឡើងឬអត់ គឺផ្អែកទៅលើលោក Ricardo Barkala បានជាប់ឆ្នោតជាប្រធានក្លិបថ្មីឬអត់។

ជាក់ស្ដែងបើយោងតាម Sportmail លោក Barkala មានគម្រោងចង់នាំយក លោក Pochettino រួមនឹងនាយកផ្នែកកីឡា លោក Ramon Planes មកធ្វើការនៅ Bilbao សាជាថ្មីម្ដងទៀត៕