ផ្លូវការ! ក្លិប Wolves បានតែងតាំងលោក Bruno Lage ជាគ្រូបង្វឹកថ្មី

អង់គ្លេស៖ ក្លិបនៅលីគកំពូលអង់គ្លេស (Premier League)បាននិយាយកាលពីថ្ងៃពុធថាលោក Bruno Lage សញ្ជាតិព័រទុយហ្កាល់ត្រូវបានតែងតាំងជាគ្រូបង្វឹកថ្មីរបស់ក្លិប WolverhamptonWanderers ។

លោក Lage មានអាយុ ៤៥ ឆ្នាំមិនដែលធ្លាប់លេងកម្រិតអាជីពទេតែលោកបានចាប់ផ្តើមអាជីពជាគ្រូបង្វឹកតាំងពីអាយុ២១ ឆ្នាំមកម្លេះ។ លោកក៏ត្រូវបានដឹកនាំក្រុមយុវជនគ្រប់កម្រិតរបស់ក្លិប Benfica របស់ប្រទេសព័រទុយហ្កាល់ចន្លោះពីឆ្នាំ២០០៤​ ដល់ឆ្នាំ ២០១២ ផងដែរ មុននឹងផ្លាស់ទៅធ្វើជាជំនួយការគ្រូបង្វឹកជាមួយមិត្តរួមជាតិរបស់លោកគឺលោក Carlos Carvalhal នៅក្លឹបអង់គ្លេស Sheffield Wednesday និងSwansea City ។

លោក Lage បានចូលកាន់តំណែងនៅក្លិប Benfica កាលពីខែមករាឆ្នាំ២០១៩ និងបានដឹកនាំក្រុមឲ្យឈ្នះពានរង្វាន់ Primeira Liga ក្នុងរដូវកាលដំបូងរបស់លោកដែលទទួលបន្ទុកផងដែរ។

លោក Lage បានប្រាប់ទៅក្លិបថា “ខ្ញុំសប្បាយចិត្តនិងរំភើបខ្លាំ​ងណាស់ហើយក៏មានមហិច្ឆតាធំក្នុងការធ្វើរឿងដ៏អស្ចារ្យសម្រាប់ក្លិបមួយនេះផងដែរ”។

លោក Lage នឹងត្រូវជំនួសមិត្តរួមជាតិលោក Nuno Espirito Santo ដែលបានចាកចេញពីតួនាទីរបស់គាត់កាលពីខែមុនបន្ទាប់ពីទទួលបន្ទុកដឹកនាំក្លឹប Midlandsអស់រយៈពេល ៤ ឆ្នាំ។

ក្លិប Wolves បានបញ្ចប់ក្នុងចំណាត់ថ្នាក់លេខ១៣ នៅក្របខណ្ឌ Premier League រដូវកាលមុននិងមានកីឡាករជាច្រើនដែលនិយាយភាសាព័រទុយហ្កាល់នៅក្នុងក្រុមរបស់ពួកគេ៕

ប្រភព៖ Xinhua News