និយាយត្រង់ៗហ្មង! កីឡាកររូបនេះថា ជម្រើសជាតិបារាំងឥលូវ លែងជាក្រុមល្អដាច់គេនៅលើលោកហើយ

September 7, 2021

អឺរ៉ុប៖ ការខកចិត្ដរបស់ជម្រើសជាតិបារាំងកាលពីព្រឹត្ដិការណ៍EURO2020 បានបន្ដមកដល់ការប្រកួតវគ្គជម្រុះ World Cup 2022 ដោយសារប្រកួតស្មើ ១-១ ចំនួនពីរប្រកួតជាប់គ្នា គឺទល់នឹងជម្រើសជាតិបូស្នៀ និងអ៊ុយក្រែនកន្លងទៅ។ជាហេតុធ្វើឲ្យ Paul Pogba និយាយអំពីស្ថានភាពដ៏លំបាករបស់ក្រុមមាន់គកបារាំងនាពេលបច្ចុប្បន្ន។

ខ្សែបម្រើមកពីក្រុមបិសាចក្រហម ManchesterUnited ដែលជាកីឡាករសំខាន់ ក្នុងការជួយក្រុមឲ្យឈ្នះពានរង្វាន់បាល់ទាត់ពិភពលោកWorld Cup កាលពីឆ្នាំ២០១៨នៅឯប្រទេសរុស្ស៊ី បាននិយាយថា បារាំងលែងជាក្រុមជម្រើសជាតិដែលល្អដាច់គេនៅលើពិភពលោកទៀតហើយ។

ម្ចាស់អាវលេខ៦រូបនេះ បាននិយាយក្រោយចប់ការប្រកួតទល់នឹងជម្រើសជាតិអ៊ុយក្រែនថា៖

វាយូរណាស់ហើយ ដែលខ្ញុំបានឈ្នះការប្រកួតជាមួយក្រុមជម្រើសជាតិ។ ខ្ញុំនឹកជ័យជម្នះណាស់ហើយគ្រប់គ្នាក៏នឹងវាណាស់ដែរ។ យើងលែងជាក្រុមល្អដាច់គេនៅលើពិភពលោកទៀតហើយ ដូច្នេះយើងត្រូវតែផ្លាស់ប្ដូរអ្វីៗគ្រប់យ៉ាងដើម្បីឲ្យក្រុមកាន់តែខ្លាំងឡើង។ យើងត្រូវតែបញ្ចេញញើសលើអាវឲ្យកាន់តែច្រើន ហើយដាក់គោលដៅបន្ថែមទៀត។
— Paul Pogba

ទន្ទឹមនឹងនេះប្រធានក្រុមជម្រើសជាតិបារាំង អ្នកចាំទី Lloris បាននិយាយដែរថា៖

ភាពរីករាយដែលយើងបានឈ្នះពាន World Cup នៅរុស្ស៊ីបានបញ្ចប់ហើយ។វាមានការផ្លាស់ប្ដូរច្រើនលើកម្រិតលេង ប៉ុន្ដែវាអាស្រ័យលើយើងទាំងអស់គ្នាទេក្នុងការបង្កើនកម្រិតលេងមកវិញ៕
— អ្នកចាំទី Lloris

ប្រភព៖ marca

អានបន្ថែម