ប៉ូលីន បង្ហាញការព្រួយបារម្ភយ៉ាងដូច្នេះ មុនប៉ះក្រុមខ្លាំងព្រះខ័នរាជស្វាយវៀង នាថ្ងៃស្អែក

July 14, 2021

MCL៖ ក្រុមភ្នំពេញក្រោន នឹងត្រូវបើកទ្វារកីឡដ្ឋាន Smart RSN ទទួលស្វាគមន៍ក្រុមភ្ញៀវព្រះខ័នរាជស្វាយវៀង សម្រាប់ការប្រកួតក្របខណ្ឌ Metfone Cambodia League ឆ្នាំ ២០២១ នាវេលាម៉ោង៦ល្ងាច ថ្ងៃទី១៥ ខែកក្កដា ស្អែកនេះ។

យ៉ាងណាមិញ នៅមុនការប្រកួតចូលមកដល់ខ្សែបម្រើឆ្នើមប្រចាំក្រុមសិង្ហក្រហមភ្នំពេញក្រោន កីឡាករ អ៊ន ចាន់ប៉ូលីន បានលើកឡើងយ៉ាងដូច្នេះថា៖

យើងខានប្រកួតយូរហើយ ពេលនេះយើងមានការប្រកួតវិញខ្ញុំមានអារម្មណ៍សប្បាយចិត្តព្រោះយើងហាត់ដើម្បីមានការប្រកួត បើមិនមានការប្រកួតគឺវារាងធុញបន្តិច។ ខ្ញុំគិតថាការខកខានយូរនេះវាអាចមានផលប៉ះពាល់តិចតួចដែលសម្រាប់ទម្រង់លេង និងអារម្មណ៍របស់ក្រុម ព្រោះពួកយើងខានប្រកួតយូរមិនដូចក្រុមគេ គេមានប្រកួតច្រើនជាងយើង អញ្ចឹងទឹកចិត្តនិងឆន្ទះវាអាចប៉ះពាល់ដែរ តែសង្ឃឹមថាវាមិនប៉ះខ្លាំងពេកទេ
— សម្ដី ប៉ូលីន

ដោយឡែក ឆ្លើយតបទៅនឹងការយល់ឃើញទៅលើក្រុមព្រះខ័នរាជស្វាយរៀងវិញ កីឡាករវ័យ២៣ឆ្នាំរូបនេះបានលើកឡើងថា៖

វានឹងអាចជាការប្រកួតមួយដ៏ស្វិតស្វាញ និងតានតឹង ហើយវាក៏ជាការប្រកួតដែលពិបាកក្នុងការរកពិន្ទុផងដែរ ទោះបីជាប៉ុន្មានប្រកួតចុងក្រោយគេធ្វើមិនសូវបានល្អ ប៉ុន្តែខ្ញុំជឿជាក់ថាស្វាយរៀងនៅតែជាក្រុមខ្លាំងមួយ ហើយគេនឹងព្យាយាមកែប្រែដើម្បីរកពិន្ទុនិងជ័យជម្នះមកវិញ ប៉ុន្តែខ្ញុំនៅតែជឿជាក់លើក្រុមរបស់ខ្ញុំថាពួកយើងនឹងធ្វើបាន៣ពិន្ទុក្នុងទឹកដីរបស់យើងព្រោះយើងត្រូវការពិន្ទុជាចាំបាច់ដើម្បីប្រជែងកំពូលតារាង។
— សម្ដី ប៉ូលីន

គួរបញ្ជក់ដែរថា បើងាកទៅមើលប្រវត្ដិជួបគ្នា ៥ប្រកួតចុងក្រោយរវាងក្រុមទាំងពីរ ភ្នំពេញក្រោនធ្លាប់បានយកឈ្នះលើព្រះខ័នស្វាយរាជរៀង ២លើក ចាញ់២លើក និងស្មើ១លើក៕

រូបភាពពីក្លិប ព្រះខ័នស្វាយរាជរៀង — រូបភាពពីក្លិប ព្រះខ័នស្វាយរាជរៀង

ប្រភព៖ ppcfc

អានបន្ថែម