បន្ទាប់ពីដួលសន្លប់ធំលើទីលាន ពេលនេះខ្សែបម្រើ Christian Eriksen បានដឹងខ្លួនឡើងវិញហើយ
បរទេស៖ ខ្សែបម្រើជម្រើសជាតិដាណឺម៉ាក Christian Eriksen បានដឹងខ្លួនវិញហើយនៅឯមន្ទីពេទ្យ ក្រោយដួលសន្លប់ធំអំឡុងជំនួប UEFA Euro 2020។ នេះបើតាមការបញ្ជាក់ពីសហព័ន្ធបាល់ទាត់ដាណឺម៉ាក។ សហព័ន្ធកីឡាបាល់ទាត់អឺរ៉ុប (UEFA) បញ្ជាក់បន្ថែមថាខ្សែបម្រើវ័យ ២៩ ឆ្នាំ របស់ Inter Milan មានស្ថានភាពល្អប្រសើរឡើងវិញ។
យប់មិញការប្រកួតនៅក្រុងកូប៉ិនហាក ប្រទេសដាណឺម៉ាក ត្រូវបានផ្អាកមុនពេលសម្រាកនៅតង់ទី១ បន្ទាប់ពីអតីតកីឡាករ Tottenham Hotspur ដួលសន្លប់នៅលើទីលាន និង ត្រូវទទួលការសង្គ្រោះបន្ទាន់ពីក្រុមគ្រូពេទ្យនៅលើទីលានតែម្ដង។ ការប្រកួតក៏ត្រូវបានបន្តវិញបន្ទាប់ពីកីឡាករក្រុមទាំង២ស្នើ ហើយជាលទ្ធផលហ្វាំងឡង់បានយកឈ្នះដាណឺម៉ាក១ទល់នឹង០ អ្នករកគ្រាប់ជ័យជម្នះឲ្យ ហ្វាំងឡង់គឺ Joel មុនពេល Hojbjerg ស៊ុតបាល់ ១១ ម៉ែត្រមិនចូល នាទីទី ៧៤ ព្រោះសង្គ្រោះបានដោយអ្នកចាំទីហ្វាំងឡង់ Lukas៕
ប្រភព៖ Reuters