កុំទាន់ទៅអារ៉ាប់អី! លេចឮថា ក្លិបនៅ PL មួយនេះចង់បាន Ronaldo មករួមក្រុម

អង់គ្លេស៖ Arsenal ជាក្លិបចុងក្រោយគេដែលបង្ហាញការចាប់អារម្មណ៍ចង់ចុះកុងត្រាយកខ្សែប្រយុទ្ធ Cristiano Ronaldo មករួមក្រុមនៅខែមករាខាងមុខ។​

ភាគីលោក Mikel Arteta មើលឃើញថា Ronaldo ជាកីឡាករដែលអាចជំនួស ខ្សែប្រយុទ្ធ Gabriel Jesus ដែលទើបតែវះកាត់របួសជង្គង់និងតម្រូវឲ្យសម្រាកក្រៅទីលាន។​

សារព័ត៌មាន Tribal Football បានផ្សាយថា ឥលូវនេះ កាំភ្លើងធំ កំពុងព្យាយាមបញ្ចុះបញ្ចូលម្ចាស់ពាន Ballon d'Or ៥សម័យរូបនេះឲ្យស្នាក់នៅអង់គ្លេសបន្តរហូតដល់ចប់រដូវកាលផងដែរ។​

យ៉ាងណាមិញ Arsenal នឹងមិនស្នើទឹកប្រាក់ដ៏ច្រើនសន្ធឹកសន្ធាប់ដូច អ្វីដែលក្លិប Al-Nassr ស្នើទៅ Ronaldo នោះឡើយ ប៉ុន្តែពួកគេជឿជាក់ថា Ronaldo ចាប់អារម្មណ៍ផ្លាស់មកទឹកដី Emirates ។

​គួរបញ្ជាក់ផងដែរថា Al-Nassr ជាក្លិបតែមួយគត់ដែលបានដាក់សំណើទៅ Cristiano Ronaldo ជាមួយចំនួនទឹកប្រាក់ជាង២០០លានអឺរ៉ូ(ស្មើនឹងប្រមាណ ២១២ លានដុល្លារ)​ក្នុងមួយរដូវកាល៕

ប្រភព៖​ sportskeeda