ទោះបីយប់មិញចាញ់មែន តែលោក Simeone នៅតែសរសើរកូនក្រុមរបស់ខ្លួនម្នាក់នេះមិនដាច់ពីមាត់

March 18, 2021

អេស្ប៉ាញ៖ គ្រូបង្គោលលោក Diego Simeone នៅតែមានការពេញចិត្តជាខ្លាំងចំពោះទម្រង់លេងរបស់កីឡាករ JoaoFelix ក្នុងការបង្ហាញខ្លួននៅទឹកដី StamfordBridge ទោះបីជាក្រុម Atletico Madrid បានធ្លាក់ចេញពីក្របខណ្ឌ Champions League ក្រោយចាញ់ក្រុមតោខៀវ Chelsea សរុបលទ្ធផលទាំងពីរជើង ៣-០ យ៉ាងណាក្តី។

គួរបញ្ជាក់ដែរថា កាលពីយប់មិញក្រុមតោខៀវChelsea បានលត់ក្រុមភ្ញៀវ AtleticoMadrid ក្នុងលទ្ធផល ២-០ នាជំនួបជើងទីពីរនៃក្របខណ្ឌ Champions League ប៉ុន្តែផ្ទុយមកវិញ ទោះបីក្រុម At. Madrid មានចាញ់ការប្រកួតយ៉ាងណាក៏ដោយ ក៏លោក Simeone នៅតែលើកសរសើរនិងពេញចិត្តជាខ្លាំងចំពោះទម្រង់លេងរបស់ខ្សែប្រយុទ្ធវ័យក្មេងសញ្ជាតិព័រទុយកាល់។

ក្រោយបញ្ចប់ការប្រកួតលោក Simeoneបានថ្លែងយ៉ាងដូច្នេះថា៖

ជាការពិតពួកគេសមនឹងទទួលបានជ័យជម្នះហើយ។មែនទែនទៅសូម្បីតែការប្រកួតកាលពីជើងដំបូងក៏ពួកគេធ្វើបានល្អផងដែរ ចំណែកឯនៅជើងទី ២នេះពួកគេក៏កាន់តែល្អទៅទៀត។ ពួកយើងបានព្យាយាមអស់ពីសមត្ថភាពហើយ ពេលខ្លះយើងក៏ជោគជ័យហើយពេលខ្លះយើងបែជាមិនអាចទទួលលទ្ធផលតាមការរំពឹងទុក។ ពួកយើងបានស្វែងរកគន្លឹះនឹងវិធីសាស្ត្រជាច្រើនដើម្បីអាចរកគ្រាប់បាល់បានប៉ុន្តែយើងនូវតែមានចន្លោះខ្វះខាតក្នុងប្រព័ន្ធប្រយុទ្ធ។ យ៉ាងណាមិញ ខ្ញុំមើលឃើញ Felixពិតជាធ្វើបានល្អមែនទែនតាំងតែពីគាត់បានចាប់ផ្តើមនៅក្នុងក្រុមនេះ។នោះហើយជាកីឡាករដែលយើងចង់បាន៕
— លោក Diego Simeone

ប្រភព៖ Marca

អានបន្ថែម