ច្រើនណាស់លោកអើយ! FIFA ប្រកាសជាផ្លូវការថាការប្រកួត World Cup វគ្គផ្ដាច់ព្រ័ត្ររវាង អាហ្សង់ទីន និង បារាំង មានអ្នកទស្សនាដល់ទៅ...

អឺរ៉ុប៖ សហព័ន្ធកីឡាបាល់ទាត់ពិភពលោក ហៅកាត់ថា FIFA បានប្រកាសជាផ្លូវការថា មានមនុស្សចូលរួមទស្សនាការប្រកួតវគ្គផ្ដាច់ព្រ័ត្រ បាល់ទាត់ពិភពលោកឆ្នាំ២០២២ រវាង អាហ្សង់ទីន និង បារាំង ដែលធ្វើឡើងនៅប្រទេសកាតា ដល់ទៅជិត ១.៥ពាន់លាននាក់ឯណោះ។

​កាលពីថ្ងៃទី១៨ខែធ្នូកន្លងទៅនេះ អាហ្សង់ទីន បានយកឈ្នះ បារាំង នៅវិញ្ញាសារបាល់កាត់សេចក្ដី១១ម៉ែត្រ ៤ ទល់នឹង២ បន្ទាប់ពីលេងស្មើគ្នា ៣-៣ នៅម៉ោងប្រកួត ដែលធ្វើឲ្យក្រុមនេះបានលើកពាន បាល់ទាត់ពិភពលោកឆ្នាំ២០២២ តែម្ដង។​

ចំនួនអ្នកទស្សនា ១.៥ពាន់លាននាក់នេះគឺគិតតែលើអ្នកទស្សនាតាមកញ្ចក់ទូរទស្សន៍ប៉ុណ្ណោះ ខណៈដែលអ្នកមកទស្សនាផ្ទាល់នៅកីឡដ្ឋាន Lusail មានជាង ៨៨,៩៩៦ នាក់។

​FIFA ក៏បានប្រកាសដែរថា បើគិតពីព្រឹត្តិការណ៍បាល់ទាត់ពិភពលោកទាំងមូលតែម្ដងគឺមានអ្នកទស្សនាជាង ៥ពាន់លាននាក់ ស្របពេលមានការស៊ុតបញ្ចូលទី១៧២គ្រាប់ ហើយមានមនុស្សចូលរួមទស្សនាដល់កីឡដ្ឋានជាថ ៣.៤លាននាក់។

​គួរបញ្ជាក់ផងដែរថាការប្រកួតបាល់ទាត់ពិភពលោកនៅ ប្រទេសកាតា នេះ មានអ្នកទស្សនាតាមកញ្ចក់ទូរទស្សន៍ច្រើនជាង ការប្រកួតបាល់ទាត់ពិភពលោកនៅប្រទេសរុស្ស៊ីនាឆ្នាំ២០១៨កន្លងទៅ៕

ប្រភព៖​ sportskeeda