អ៊េមមែន! វៀតណាម ស៊ុតមួយជើងពីចម្ងាយដូចកាំជ្រួច ជួយក្រុមរក្សាលទ្ធផល ២ទល់២ ជាមួយថៃ ពាន AFF CUP (មានវីដេអូ)

អាស៊ាន៖ ក្រុមជម្រើសជាតិវៀតណាម និង ក្រុមជម្រើសជាតិថៃ ពិតជាបានប្រយុទ្ធគ្នាយ៉ាងស្វិតស្វាញខ្លាំងមែនទែនក្នុងជំនួបជើងទី១ វគ្គផ្តាច់ព្រ័ត្រពានរង្វាន់ AFF Cup កាលពីយប់មិញ នៅកីឡដ្ឋាន My Dinh របស់ប្រទេសវៀតណាម។

ជាការពិតណាស់ នៅក្នុងវគ្គទី១ គឺ វៀតណាម ហាក់សង្កត់ខ្លាំងមកលើ ក្រុមភ្ញៀវថៃ រហូតរកគ្រាប់បាល់បានពីការតែតបញ្ចូលទីរបស់កីឡាករ​ Nguyen Tien Linh នៅនាទីទី២៤ និង ជាគ្រាប់បាល់តែមួយគត់ក្នុង៤៥នាទីដំបូង។

លុះឈានចូលដល់វគ្គទីពីរបានតែ៣នាទីប៉ុណ្ណោះ Poramet Arjvirai ក៏បានរកគ្រាប់បាល់តាមស្មើឲ្យថៃ ក្រោយទទួលបានបាល់បញ្ចូនសម្លាប់ល្អមែនទែនពី Theerathon Bunmathan ហើយ មិនទាន់អស់ត្រឹមនេះទេ​ Theerathon ដដែលក៏បានបញ្ចូនបាល់មួយគ្រាប់ទៀតឲ្យ Sarach Yooyen បើកការនាំមុខវិញនៅនាទីទី​ ៦៣។ ជិតចប់ការប្រកួតទៅហើយ ពោលនាទីទី  ៨៨ Vu Van Thanh របស់វៀតណាម បានស៊ុតបញ្ចូលទីគ្រាប់បាល់ដ៏អស្ចារ្យពីចម្ងាយមើលសឹងមិនចង់ទាន់ ជួយ វៀតណាម រក្សាបានលទ្ធផលស្មើគ្នា ២ទល់នឹង២ នៃការប្រកួតជើងទី១ វគ្គផ្តាច់ព្រ័ត្រពានរង្វាន់ AFF Cup ខណៈ ការប្រកួតជើងទី២ នឹងធ្វើឡើងនៅថ្ងៃទី១៦ នាទឹកដីថៃវិញ៕