ថាម៉េច? Barca ចង់ដាក់ Dembele និង Roberto ប្ដូរយក តារាឆ្នើមរបស់ Man City ពីររូបនេះ

អឺរ៉ុប៖ ក្លិបអ្នកមានបុណ្យ Barcelona និង Manchester City កំពុងទាក់ទងគ្នាទៅមកមិនដាច់ ដោយសារថ្មីៗនេះ កីឡាកររបស់ Manchester City ពីររូបគឺ ខ្សែប្រយុទ្ធ Sergio Aguero និង Eric Garcia សុទ្ធតែផ្ទេរមកទឹកដី Camp Nou ទាំងអស់។

យោងតាមការរាយការណ៍ពី Dario Sport គឺ ទំនាក់ទំនងរវាងក្លិបទាំងពីរពិតជាល្អណាស់និងអាចមានផែនការដោះដូរកីឡាករគ្នានៅរដូវក្ដៅនេះទៀតផង ដោយ Barcelona ចង់បាន កីឡាកររបស់ Man City ពីររូបទៀតគឺខ្សែការពារ Joao Cancelo និង Bernado Silva។

ជាថ្នូរនឹងការយកតារាឆ្នើមពីររូបនេះគឺ Barcelona ព្រមឲ្យ ខ្សែបម្រើ Sergio Roberto និង Ousmane Dembele ទៅឲ្យ Man City ផងដែរ។

Dembele ជាកីឡាករសំខាន់ម្នាក់របស់ Barcelona ប៉ុន្តែគេជិតនឹងផុតកុងត្រាជាមួយក្លិបហើយពោលគឺនៅរដូវកាលក្រោយនេះ ខណៈឮពាក្យចចាមអារ៉ាមថា Dembele ចង់ផ្ទេរទៅ Juventus ឬ PSG ទើបក្លិបចង់លក់គេចេញ។

ចំណែក Sergio Roberto វិញក៏ត្រូវក្លិបសម្រេចចិត្តដាក់លក់គេដែរ ដោយសារតែគេមានប្រាក់ឈ្នួលខ្ពស់ពេកទើបក្លិបដែលកំពុងប្រឈមនឹងវិបត្តិហិរញ្ញវត្ថុស្រាប់មិនអាចផ្ដល់ប្រាក់ឈ្នួលឲ្យបាន។

ចំណែក ខ្សែបម្រើ Bernado Silva និងខ្សែការពារ Joao Cancelo វិញគឺជាកីឡាករសំខាន់របស់ Manchester City ក្រោមការដឹកនាំរបស់លោកគ្រូបង្វឹក Pep Guardiola ដែលគេដឹងថា Pep មិនចង់បាត់បង់កូនក្រុមទាំងពីររូបនេះឡើយ៕

ប្រភព៖​ football-espana