ឃើញលេងល្អនៅ World Cup! Chelsea គ្រោងចូលប្រជែងជាមួយ Liverpool ក្នុងការទិញយកតារាឆ្នើមអាហ្សង់ទីនម្នាក់នេះ

អង់គ្លេស៖ ក្លិបតោខៀវ Chelsea ត្រូវបានគេរាយការណ៍ថាបាននិយាយជាមួយភ្នាក់ងាររបស់ខ្សែបម្រើ Enzo Fernandez នៃក្លិប Benfica និងដាក់ផែនការទិញយកគេនៅខែមករាឆ្នាំ២០២៣ខាងមុខនេះ។​

Enzo បានទាក់ទាញចំណាប់អារម្មណ៍ក្លិបធំៗនៅអឺរ៉ុប បន្ទាប់ពីស៊ុតបញ្ចូលទីបាន១គ្រាប់នៅព្រឹត្តិការណ៍បាល់ទាត់ពិភពលោកឆ្នាំ២០២២ ដោយក្នុងនោះរូបគេបានឈ្នះពាន កីឡាករវ័យក្មេងឆ្នើមបំផុតប្រចាំព្រឹត្តិការណ៍នេះ និងបានជួយអាហ្សង់ទីន លើកពានផងដែរ។

​អ្នកកាសែត Fabrizio Romano ធ្លាប់បានចុះផ្សាយថា មានក្លិបនៅ La Liga និង Premier League ចាប់អារម្មណ៍គេក្នុងនោះមាន Liverpool ដែរតែ Benfica ទំនងជាមិនចង់ឲ្យកីឡាកររូបនេះចាកចេញនៅរដូវកាលនេះទេ។

​យោងតាមអ្នកកាសែត Simon Phillips គឺ Chelsea ត្រៀមរួចរាល់ហើយក្នុងការទិញយកខ្សែបម្រើរូបនេះ ក្រោយមានការជជែកជាមួយភ្នាក់ងារគេរួចមក ស្របពេលតម្លៃផ្ដាច់កុងត្រារបស់ Enzo Fernandez គឺខ្ទង់១២០លានអឺរ៉ូ(ស្មើនឹងប្រមាណ ១២៧.៤ លានដុល្លារ)៕

ប្រភព៖​ sportskeeda