ទ្រាំលែងបានហើយ! ចំណែកលើសរបស់ Man UTD រូបនេះសារភាពថាគេខឹងដែលគ្រូមិនដាក់ឲ្យចូលលេង

September 7, 2021

អង់គ្លេស៖ ខ្សែបម្រើ Donny van de Beek នៃក្លិបបិសាចក្រហម Manchester United បានបង្ហើបពីបញ្ហាផ្លូវអារម្មណ៍របស់គេបន្ទាប់ពីលោកគ្រូ Ole Gunnar Solskjaer មិនសូវដាក់គេឲ្យចូលលេង។

de Beek ផ្ទេរពី Ajax មកទឹកដី Old Trafford កាលពីឆ្នាំមុនប៉ុន្តែមកទល់ពេលនេះហើយកីឡាករសញ្ជាតិហូឡង់រូបនេះមិនបានជាប់ជម្រើស១១នាក់ដំបូងញឹកញាប់នោះឡើយនិងភាគច្រើនចំណាយពេលអង្គុយកៅអីបម្រុងប៉ុណ្ណោះខណៈដែលភ្នាក់ងាររបស់គេក៏ធ្លាប់ចេញមុខនិយាយដែរថា de Beek ចង់មាននាទីលេងជាប់លាប់។

ក្នុងកិច្ចសម្ភាសន៍ជាមួយលោក Rio Ferdinand កីឡាកររូបនេះបានបង្ហើបអារម្មណ៍ពិតថាមានពេលខ្លះគេខឹងដែលមិនត្រូវគ្រូដាក់ឲ្យចូលលេងទាំងដែលគេព្យាយាមហ្វឹកហាត់រាល់ថ្ងៃ។

Donny van de Beek បានថ្លែងថា៖

វាពិតជាពិបាកពេលអ្នកដូចជាកីឡាករដែលមិនមែននៅក្នុងក្រុម អ្នកមានតែទន្ទឹងរង់ចាំឱកាសដើម្បីចូលលេង។ វាមិនមែនជារឿងងាយស្រួលទេបើសិនអ្នកមិនមាននាទីចូលលេងហើយទំនុកចិត្តរបស់ខ្ញុំក៏ធ្លាក់ចុះលើខ្លួនឯងដែរ។ ខ្ញុំចង់ចូលលេងណាស់ ហើយវាពិតជាពិបាកក្នុងការទ្រាំទ្រជាមួយសំពាធផ្នែកផ្លូវអារម្មណ៍។ ខ្ញុំបានហ្វឹកហាត់យ៉ាងសកម្មជារៀងរាល់ថ្ងៃ ខ្ញុំព្យាយាមពង្រឹងខ្លួនឯង ហើយរង់ចាំឱកាសបានចូលលេង នោះជាអ្វីតែម្យ៉ាងគត់ដែលខ្ញុំអាចធ្វើបាន។ ពិតណាស់ ពេលខ្លះខ្ញុំមានអារម្មណ៍ថាខឹង ការពិតកីឡាករទាំងអស់(ដែលមិនបានចូលលេង)សុទ្ធតែមានអារម្មណ៍បែបនោះ តែខ្ញុំមិនបង្ហាញចេញទេបើសិនខ្ញុំមិនហ្វឹកហាត់យ៉ាងសកម្ម។ ខ្ញុំនឹងមិនបង្ហាញអត្តចរិតច្រងេងច្រងាងទេគឺបន្តរក្សាភាពសុទិដ្ឋិនិយម និងព្យាយាមធ្វើឲ្យខ្លួនកាន់តែល្អឡើងជារៀងរាល់ថ្ងៃ។ ការជះកំហឹងចេញមកក្រៅមិនបានជួយអ្វីដល់ក្រុមទេ។
— ខ្សែបម្រើ Donny van de Beek

ប្រភព៖ dailymail

អានបន្ថែម