លេចឮដំណឹងថា ក្រុមបិសាចក្រហមផ្តល់ទឹកប្រាក់ជាង ៨១លានផោន លើខ្សែប្រយុទ្ធម្នាក់របស់ Dortmund

បរទេស៖ តាមសេចក្តីរាយការណ៍បានឱ្យដឹងថាក្រុមបិសាចក្រហម Manchester United នឹងត្រូវបង់ប្រាក់ ៨១.៥ លានផោនដើម្បីចុះហត្ថលេខាជាមួយខ្សែប្រយុទ្ធ Borussia Dortmund កីឡាករ Jadon Sancho ក្នុងឱកាសដោះដូរកីឡាកររដូវក្តៅនេះ។

ម្ចាស់ជើងឯកអង់គ្លេស ២០ សម័យ Man Utd ត្រូវបានផ្សារភ្ជាប់យ៉ាងខ្លាំងជាមួយកីឡាករវ័យ ២១ ឆ្នាំកាលពីរដូវកាលមុនប៉ុន្តែមិនបានត្រៀមខ្លួនដើម្បីឆ្លើយតបនឹងតម្លៃស្នើសុំរបស់ BVB ដែលត្រូវបានគេគិតថាកាលនោះ Sancho មានតម្លៃដល់ទៅ ១០៨ លានផោន។

Man United ត្រូវបានគេជឿជាក់ថាបានមានចំណាប់អារម្មណ៍សារជាថ្មីលើកីឡាករក្នុងក្រុមជម្រើសជាតិអង់គ្លេសរូបនេះ ហើយហាក់ដូចជាប្តេជ្ញាថានឹងជំរុញតាមរយៈកិច្ចព្រមព្រៀងនៅក្នុងទីផ្សារនាពេលខាងមុខនេះ​ ។

បើយោងទៅតាមកាសែត The Mirror បានអោយដឹងថាក្រុមរបស់លោក Ole Gunnar Solskjaer ត្រូវបានគេប្រាប់ថាពួកគេនឹងត្រូវការការផ្តល់ជូននូវទឹកប្រាក់ ៨១.៥ លានផោនដើម្បីធានាការចុះហត្ថលេខារបស់គាត់នៅក្នុងសប្តាហ៍ខាងមុខនេះ។ ប្រភពដដែលបានអះអាងថាលក្ខន្តិកៈផ្ទាល់ខ្លួនត្រូវបានព្រមព្រៀងរួចហើយ ប៉ុន្តែក្លិបទាំងពីរនៅតែស្ថិតក្នុងការចរចាអំពីរចនាសម្ពន្ធ័នៃការទូទាត់ដោយ Dortmund ចង់ទទួលបានប្រាក់ច្រើនជាមុន ។

គួរឲ្យដឹងផងដែរថា Sancho ដែលបច្ចុប្បន្នកំពុងនៅជាមួយក្រុមជម្រើសជាតិអង់គ្លេសដែលត្រៀមសំរាប់ Euro ២០២០ បានស៊ុតបញ្ចូលទីបាន ១៦ គ្រាប់និងបានបញ្ជូនបាល់ Assist ឲ្យក្រុមបាន ២០ ដងក្នុងការបង្ហាញខ្លួនចំនួន ៣៨ ដងនៅកម្រិតក្លឹបអំឡុងរដូវកាល ២០២០-២១ ៕