ឌឺណាស់! Aguero ស៊កសៀតទៅ Zlatan បែបនេះវិញ ក្រោយគេរិះ»_គន់ កាយវិការអបអររបស់ក្រុមជម្រើសជាតិអាហ្សង់ទីន

January 28, 2023

អឺរ៉ុប៖ អតីតខ្សែប្រយុទ្ធ Sergio Aguero បានវាយបកទៅ Zlatan Ibrahimovic ដែលបានរិះគន់កាយវិការអបអរ និងអត្តចរិតរបស់ក្រុមជម្រើសជាតិអាហ្សង់ទីន កំលុងពេលលើកពានបាល់ទាត់ពិភពលោកឆ្នាំ២០២២។

Zlatan បាននិយាយថា កីឡាករក្រុមជម្រើសជាតិអាហ្សង់ទីនទាំងអស់ក្រៅ Lionel Messi នឹងគ្មានឱកាសបានឈ្នះពានអ្វីទៀតនោះឡើយព្រោះកាយវិការមិនសមរម្យរបស់ពួកគេ បន្ទាប់ពីឃើញ Emi Martinez បានឌឺដង Kylian Mbappe ក្រោយបំបាក់បារាំង នៅវគ្គផ្ដាច់ព្រ័ត្រ នាថ្ងៃទី១៨ខែធ្នូឆ្នាំ២០២២កន្លងទៅ។

ឥលូវនេះស្រាប់តែ Aguero បានវាយបកទៅ Zlatan ថា៖

ខ្ញុំចាំថាអ្នកឯងក៏បង្ហាញអត្តចរិតមិនល្អដែរ ត្រូវទេ? ខ្ញុំចាំបានថាពួកយើងកាលណោះលេងទល់នឹង United ហើយខ្ញុំអង្គុយនៅកៅអីបម្រុង។ អ្នកនិយាយឌឺដង និងនិយាយតបត។ ខ្ញុំគិតថាមុននឹងអ្នកបារម្ភពីអាហ្សង់ទីន គួរតែគិតពីប្រទេសរបស់អ្នក ពីកីឡាកររបស់អ្នកទៅ ដែលមិនទាំងមានកៅអីលេងបាល់ទាត់ពិភពលោកផង។ ខ្ញុំចាំបានថាអ្នកឈ្លោះជាមួយ Otamendi រវាងការប្រកួតទល់នឹង Man City ហើយអ្នកឈ្លោះជាមួយ Pep Guardiola ទៀត។ដូច្នេះហើយបានជាគាត់ចង់លក់អ្នកចេញពី Barcelona ។ អ្នកមិនគោរពមិត្តរួមក្រុមរបស់អ្នកសោះ។ ប្រហែលអ្នកនិយាយពីខ្ញុំហើយព្រោះខ្ញុំក៏នៅទីនោះដែរ។ ខ្ញុំមានអារម្មណ៍ថាអ្នកសំដៅមកខ្ញុំទើបខ្ញុំនិយាយសំដៅទៅអ្នកវិញ។ ពួកយើងគឺជាជើងឯកពិភពលោកណា៎ Zlatan ។
— អតីតខ្សែប្រយុទ្ធ Sergio Aguero

ប្រភព៖ metro

ដៃគូរសហការ One Football

អានបន្ថែម