គ្រូបង្វឹកឆ្នើមរូបនេះ នឹងទទួលការងារដឹកនាំ Chelsea ប្រសិនបើ លោក Potter ត្រូវបណ្ដេញចេញ

បរទេស៖ អតីតគ្រូបង្វឹកក្រុមមាន់ខ្នាយមាស​ TottenhamHotspur លោក Mauricio Pochettino ត្រូវ​បានគេរាយការណ៍មកថា លោកមានចំណាប់អារម្មណ៍ក្នុងការទទួលការងារ​ដឹកនាំក្លិបតោខៀវ​ Chelsea ប្រសិនបើក្លិបយក្សនៅទីក្រុងឡុងដ៍មួយនេះ បណ្ដេញលោក GrahamPotter ចេញ។

លោក Potter កំពុងរងសម្ពាធខ្លាំងនៅទឹកដី Stamford Bridge បន្ទាប់ពីដឹកនាំ​​ Chelsea ទទួលបានលទ្ធផលយ៉ាប់យ៉ឺនមែនទែន នៅមួយរយៈចុងក្រោយ ពោលគឺចាញ់ដល់ទៅ៦លើក ក្នុងចំណោម៩ប្រកួតចុងក្រោយ។

ហើយតាមរយៈលទ្ធផលខាងលើនោះ បានធ្វើឲ្យ Chelsea ធ្លាក់មកឈរលេខ១០ នៅ Premier League និង ធ្លាក់ចេញពី ពានរង្វាន់ចំនួន២នៅអង់គ្លេស ។

បើយោងតាមកាសែត the Sun បានឲ្យដឹងថា លោក Pochettino នឹងទទួលការងារដឹកនាំនៅ Chelsea ប្រសិនបើក្លិបចែកផ្លូវជាមួយលោក Potter ។ ទោះជាយ៉ាងណាក៏ដោយ លោក Potter នៅមានឱកាសស្រោចស្រង់ការងាររបស់ខ្លួន ក៏ព្រោះតែម្ចាស់ក្លិប Chelsea ត្រូវបានគេរាយការណ៍មកថា នឹងផ្ដល់ពេលវេលាឲ្យ លោក Potter ពង្រឹងក្រុម ហើយលទ្ធផលពេលប៉ះ Fulham ថ្ងៃទី១៣ ខាងមុខ​ អាចជាការកាត់សេចក្ដីលើជោគវាសនា របស់លោក Potter នៅទឹកដី Stamford Bridge ។

គួររម្លឹកដែរថា លោក Pochettinoបាននៅទំនេរពីការងារ តាំងពីចាកចេញពីក្លិប ParisSaint-Germain កាលពីចុងរដូវកាលមុន មកម្ល៉េះដោយលោកធ្លាប់មានស្នាដៃដឹកនាំក្លិបយក្សបារាំងលើកពាន Ligue 1 បានម្ដង៕

ប្រភព៖​ AF