មិនខ្វល់ថាចាយលុយច្រើនប៉ុណ្ណាទេ! Keane ថា Man UTD ត្រូវតែទិញយកតារាឆ្នើមរូបនេះឱ្យបាន

June 11, 2021

អង់គ្លេស៖ លោក Roy Keane ដែលជាអតីតកីឡាកររបស់ Manchester United ចង់ឃើញអតីតក្លិបរបស់លោកទិញយកខ្សែប្រយុទ្ធ Harry Kane នៃក្លិប Tottenham Hotspur ក្រោយពាក្យចចាមអារ៉ាមថាគេចាកចេញពី Spurs បានផ្ទុះឡើង។

Kane បានបង្ហាញចំណាប់អារម្មណ៍ចង់ឈ្នះពានជាមួយក្លិបបាល់ទាត់ដែលគេលេងឲ្យ ប៉ុន្តែតាំងពីចូលលេងឲ្យ Spurs មក កីឡាកររូបនេះមិនទាន់បានលើកពានអ្វីជាមួយក្លិបឡើយទើបគេសម្លឹងរកផ្លូវចង់ចាកចេញស្របពេល Manchester United, Manchester City និង Chelsea សុទ្ធតែចាប់អារម្មណ៍ចង់នាំយកគេមករួមក្រុមទាំងអស់។

លោក Roy Keane ឯណោះវិញបានជម្រុញឲ្យ Manchester United ទិញយកកីឡាករវ័យ២៧ឆ្នាំនេះឲ្យទាល់តែបាន ទោះបីត្រូវចាយលុយដល់ខ្ទង់១៧០លានដុល្លារក៏ដោយ ប៉ុន្តែលោកបានបញ្ជាក់ថា Kane នៅខ្វះភាពជាអ្នកដឹកនាំ។

លោក Keane គិតថា បើទោះជា Harry Kane មាននាមជាប្រធានក្រុម Spurs និងក្រុមជម្រើសជាតិអង់គ្លេសក៏ដោយក៏គេនៅខ្វះខាតការជំរុញទឹកចិត្តរបស់កីឡាករក្នុងក្រុម។

លោកបានថ្លែងប្រាប់ SkyBet ថា៖

អ្វីតែម្យ៉ាងគត់ដែលខ្ញុំចង់និយាយគឺ Kane មានចំណុចអវិជ្ជមានមួយចំនួន។ ខ្ញុំគិតថា Kane ជាកីឡាករមួយដ៏អស្ចារ្យ ក្លិបនីមួយៗគឺតែព្យាយាមទិញយកគេ Manchester United ក៏ត្រូវតែទិញយកគេដែរ ខ្ញុំមិនខ្វល់ទេថាក្លិបត្រូវចាយលុយដល់ ១២០លានផោន(១៧០លានដុល្លារ)ឬច្រើនជាងនេះ អ្នកត្រូវតែទិញយកគេ។ ប៉ុន្តែខ្ញុំមិនគិតថាគេជាអ្នកដឹកនាំដ៏ល្អមួយរូបនោះឡើយ ខ្ញុំមិនដែលឃើញគេរិះគន់និងលើកទឹកចិត្តនរណាម្នាក់នៅ Spurs ឡើយ។ ខ្ញុំដឹងថាមនុស្សជាច្រើននឹងនិយាយថានោះមិនមែនជាអត្តចរិតរបស់ Kane ឬក៏គេអាចនឹងធ្វើបែបនោះនៅក្នុងបន្ទប់ផ្លាស់សំលៀកបំពាក់ប៉ុន្តែខ្ញុំមិនគិតថាធ្វើអីបែបនោះទេ ហើយនោះជាបញ្ហាធំមួយ។ អូខេ!អ្នកអាចគិតយ៉ាងណាក៏ស្រេចតែអ្នក ប៉ុន្តែខ្ញុំគិតថាពេលខ្លះ ខ្ញុំចង់ឃើញផ្នែកមួយទៀតរបស់ Kane៕
— លោក Roy Keane

ប្រភព៖ goal

អានបន្ថែម