ផ្លូវការ!! Barca ប្រកាសព្រមព្រៀងបន្តកុងត្រាថ្មីដល់កីឡាកររូបនេះ

អេស្ប៉ាញ៖ ក្លិបអ្នកមានបុណ្យ Barcelona បានប្រកាសជាផ្លូវការថាក្លិបបានបន្តកុងត្រាថ្មីដល់ ខ្សែការពារ Oscar Mingueza ដែលកុងត្រាថ្មីនេះមានសុពុលភាពរហូតដល់ឆ្នាំ២០២៣ ។

ក្នុងនោះដែរ តម្លៃផ្ដាច់កុងត្រារបស់កីឡាករសញ្ជាតិអេស្ប៉ាញរូបនេះគឺខ្ទង់ ១០០លានអឺរ៉ូ(ស្មើនឹងប្រមាណ១២០.៨លានដុល្លារ)នៅមួយឆ្នាំបន្ទាប់។

Mingueza ត្រូវលោកគ្រូ Ronald Koeman ផ្ដល់ឱកាសឲ្យឡើងមកលេងនៅឈុតធំនៅរដូវកាលនេះ បន្ទាប់ពីបានបង្ហាញទម្រង់លេងដ៏លេចធ្លោក្នុងការបង្ហាញខ្លួនត្រឹមតែ ៣៥ ប្រកួតនៅឈុត Barcelona B ដោយគេបានចូលហ្វឹកហាត់បាល់ទាត់តាំងពីអាយុ៨ឆ្នាំនៅថ្នាលយុវជន La Masia របស់ក្លិប។

នៅរដូវកាលនេះ Mingueza ចូលលេងឲ្យក្រុមឈុតធំរបស់Barcelona បាន៣៥ប្រកួត ដែលបានស៊ុតបញ្ចូលទី២គ្រាប់ ដោយ១គ្រាប់ក្នុងនោះគឺក្នុងការប្រកួត El Clasico ផងដែរ។

ខ្សែការពារ Oscar Mingueza ចាត់ទុកជាសមិទ្ធផលដ៏ល្អមួយរបស់ La Masia ព្រោះគេបានឆ្លងកាត់ការចូលលេងតាំងពីឈុតក្រោមដល់ឈុតធំ ខណៈប្អូនស្រីរបស់គេគឺ Adriana Mingueza ក៏ទើបតែបានឡើងមកលេងនៅឈុតនារីរបស់ Barcelona កាលពីខែមុនដែរ៕

ប្រភព៖​ football-espana

ដើម្បីទទួលបានព័ត៌មានឆាប់រហ័ស សូមចូលទៅកាន់ Group Telegram របស់ Khmerload តាមរយៈតំណភ្ជាប់ខាងក្រោម ៖
https://t.me/khmerload