មិនមែនលំៗទេ! ក្លិបអ្នកមានជាន់ថ្មី Newcastle កំពុងត្រៀមជះលុយយកកីឡាករ Inter ម្ដងមួយគូ

បរទេស៖ យោងតាមសេចក្ដីរាយការណ៍បានឲ្យដឹងថាក្លិបសារិកាព្រៃ Newcastle United កំពុងសម្លឹងចង់បានកីឡាករក្រុមInterMilan ចំនួន២រូប រួមមាន ខ្សែការពារស្លាបស្ដាំ Denzel Dumfries និង ខ្សែបម្រើ Hakan Calhanoglu នៅទីផ្សារដោះដូររដូវក្ដៅនេះ។

Newcastle មានដំណឹងលេចឮច្រើន ជុំវិញការប្រមាញ់រកកីឡាករថ្មីមករួមក្រុម ដោយលោកគ្រូ Eddie Howe ចង់ពង្រឹងក្រុមបន្ថែម។ ជាមួយគ្នានេះ បើយោងតាមការចុះផ្សាយរបស់កាសែតអ៊ីតាលីCalciomercato បានឲ្យដឹងថា កីឡាករ២រូបចុងក្រោយគេ ដែលស្ថិតក្នុងបញ្ជីគោលដៅនាំចូលរបស់Newcastleនៅប៉ុន្មានសប្ដាហ៍ខាងមុខ គឺកីឡាករ Dumfries និង Calhanoglu ស្របពេលដែល Inter ក៏មានតម្រូវការបញ្ចេញកីឡាករខ្លះផងដែរ នៅរដូ​វក្ដៅនេះ។

ប្រភពដដែលបានបន្ថែមទៀតថា សម្រាប់តម្លៃខ្លួនរវាង Dumfries និង Calhanoglu គឺក្នុងម្នាក់Interទាមទារចង់បាន ៣០លានអឺរ៉ូ ក៏ព្រោះថាក្លិបជើងឯករង Serie A រដូវកាលមុនមួយនេះ ត្រូវការចំណូលពីការលក់កីឡាករ៦០លានអឺរ៉ូ នៅរដូវក្ដៅនេះ។

គួរម្លឹកដែរថា Dumfries​ បង្ហាញខ្លួនបាន៣៣ប្រកួត ឲ្យ Inter កាលពីរដូវកាលមុន ចំណែកឯ ខ្សែបម្រើ Calhanoglu រកបាន៧គ្រាប់ និងបញ្ចូនបាល់ឲ្យមិត្តរួមក្រុមបញ្ចប់ទីបាន១២ដង ក្នុងចំណោមការបង្ហាញខ្លួន ៣៤ប្រកួត​ ៕