លក់ឬមិនលក់? AC Milan ចង់ចូលចែចូវអ្នកចាំទីនៅ Man UTD រូបនេះ

អ៊ីតាលី៖ បើទោះបីជាកំលុងពេលនេះ ជាការប្រកួតបាល់ទាត់ Euro 2020 ក្ដីក៏ពាក្យចចាមអារ៉ាមនៃការទិញដូរកីឡាករនៅតែផ្ទុះឡើងហើយពេលនេះលេចឮថា ក្លិប AC Milan នៅអ៊ីតាលី ចង់ដាក់សំណើទិញយក អ្នកចាំទី Dean Henderson ពីក្លិប Manchester United ។

Henderson មានឱកាសបានជំនួស David De Gea កំលុងពេល De Gea ទៅអេស្ប៉ាញដើម្បីមើលថែភរិយានិងកូនស្រី ប៉ុន្តែលុះពេលគេត្រឡប់មកវិញ លោកគ្រូបង្វឹក Ole Gunnar Solskjaer នៅតែជឿជាក់ឲ្យ De Gea ចូលលេងក្នុងនាមជាអ្នកចាំទីដៃទី១ ព្រោះសូម្បីក្នុងការប្រកួតវគ្គផ្ដាច់ព្រ័ត្រទល់នឹង Villarreal ក៏ Solskjaer ដាក់ De Gea ឲ្យចូលលេងដែរបញ្ជាក់ថា Solskjaer នៅតែមិនទុកចិត្ត Henderson។

មានការជជែកវែកញែកជាច្រើនលើកឡើងថា Dean Henderson មិនទាន់មានសមត្ថភាពអាចជំនួស De Gea បានទេ ដូច្នេះឆ្លៀតឱកាសនោះ AC Milan មានចំណាប់អារម្មណ៍ចង់ទិញយកគេមកជំនួសអ្នកចាំទី Gianlurgi Donnarumma នេះបើយោងតាម Football Insider ហើយសារព័ត៌មាននេះក៏បានបង្ហើបដែរថា Solskjaer ក៏ទំនងជាចង់លក់អ្នកចាំទីវ័យ២៤ឆ្នាំរូបនេះដែរ។

គួរបញ្ជាក់ផងដែរថា Dean Henderson ចូលលេងឲ្យឈុតធំរបស់ Manchester United តាំងពីឆ្នាំ២០១៥ប៉ុន្តែត្រូវក្លិបដាក់គេឲ្យខ្ចីជើងនៅ Stockport County, Grimsby Town, Shrewsbury Town និង Sheffield United ជាដើម៕

ប្រភព៖​ caughtoffside