គេល្អណាស់! Darren Bent គិតថា ខ្សែប្រយុទ្ធ PL រូបនេះនឹងរកគ្រាប់បាល់ច្រើនជាង Ronaldo ទៀតរដូវកាលនេះ

September 8, 2021

អង់គ្លេស៖ អតីតកីឡាករក្រុមជម្រើសជាតិអង់គ្លេស លោក Darren Bent ជឿជាក់ថា កីឡាករ Romelu Lukaku នឹងរកគ្រាប់បាល់បានច្រើនជាង Cristiano Ronaldo នៅក្នុងរដូវកាលនេះ។

ជាការពិតណាស់ នៅក្នុងទីផ្សារដោះដូរកីឡាកររដូវក្តៅដែលទើបតែបានបិទបញ្ចប់នាពេលថ្មីៗនេះ យើងឃើញថា Lukaku បានសម្រេចចិត្តចាកចេញពី Inter Milan ដើម្បីត្រឡប់មកកាន់ Chelsea វិញ ខណៈ Ronaldo ក៏បានផ្លាស់មកកាន់ Man Utd ហើយ ទំនងជាអាចនឹងបង្ហាញខ្លួនក្នុងការប្រកួតសប្តាហ៍ទី៤ទល់នឹង Newcastle United នាថ្ងៃសៅរ៍សប្តាហ៍នេះផងដែរ។

កីឡាករ Romelu Lukaku និង Cristiano Ronaldo — កីឡាករ Romelu Lukaku និង Cristiano Ronaldo

លោក Bent បាននិយាយថា៖

ប្រសិនបើអ្នកក្រឡេកទៅមើល Chelsea និង មើលពីគ្រាប់បាល់ដែលគេនឹងស៊ុតបញ្ចូលទី ខ្ញុំគិតថាគ្រាប់បាល់ជាច្រើននឹងកើតចេញពី Lukaku។ ពួកយើងដឹងហើយថា Ronaldo ជា កីឡាករដែលមានសមត្ថភាពខ្លាំងប៉ុណ្ណា ប៉ុន្តែ Mason Greenwood, Bruno Fernandes, Edinson Cavani និង Marcus Rashford នឹងអាចរកគ្រាប់បាល់បានដូចគ្នា។ Ronaldo ប្រហែលជាមិនអាចបង្ហាញខ្លួនគ្រប់ការប្រកួតបាននោះទេ ប៉ុន្តែ សម្រាប់ Lukaku ប្រសិនបើគេគ្មានបញ្ហារបួសទេ គឺ គេនឹងបង្ហាញខ្លួនគ្រប់ការប្រកួត បច្ចុប្បន្នគេកំពុងមានគ្រាប់បាល់លើស Ronaldo មួយគ្រាប់ ដូច្នេះខ្ញុំគិតថា វាជាការចាប់ផ្តើមដ៏ល្អ៕
— លោក Darren Bent

កីឡាករ Romelu Lukaku — កីឡាករ Romelu Lukaku

ប្រភព៖ metro

អានបន្ថែម