អារម្មណ៍ពិត! អតីតកីឡាករ Barca រូបនេះថាគេឈឺចាប់ណាស់ដែលត្រូវចាកចេញទាំងមិនចង់

September 4, 2021

អង់គ្លេស៖ ខ្សែការពារ Emerson Royal ដែលទើបនឹងត្រូវ Barcelona លក់មកឲ្យ Tottenham Hotspur បានបង្ហើបអារម្មណ៍ពិតថាគេឈឺចាប់ណាស់ដែលត្រូវចាកចេញទាំងមិនចង់។

Emerson បានផ្ទេរមកទឹកដី Camp Nou កាលពីខែមិថុនាក្នុងតម្លៃខ្លួន១១លានដុល្លារពីក្លិប Real Betis ហើយគេមានក្ដីស្រមៃចង់លេងនៅទីនោះរយ:ពេលយូរតែពីរខែកន្លងមកស្រាប់តែក្លិបបានជូនដំណឹងថានឹងលក់គេទៅឲ្យ Spurs ក្នុងតម្លៃ៣៥លានដុល្លារបន្តទៀតទាំងដែលចូលលេងទើបបាន៣ប្រកួត។

កីឡាករសញ្ជាតិប្រេស៊ីលរូបនេះបានថ្លែងប្រាប់ Marca ថា៖

ខ្ញុំគិតថាក្លិបចង់ឲ្យខ្ញុំនៅបន្ត ខ្ញុំបានជាប់ជម្រើស១១នាក់ដំបូងកាលពីថ្ងៃអាទិត្យ បន្ទាប់មកស្អែកឡើងខ្ញុំក៏ភ្ញាក់និងត្រៀមខ្លួនទៅហ្វឹកហាត់។ បន្ទាប់មកខ្ញុំចាប់ផ្ដើមដឹងថា Barca បានពិភាក្សាជាមួយ Tottenham ហើយកិច្ចព្រមព្រៀងជិតនឹងរួចរាល់ហើយ។ ខ្ញុំមិនដឹងថាមានរឿងអ្វីកើតឡើងទេ។ ប៉ុន្តែថ្ងៃឡើង ក្លិបបានទាក់ទងមកខ្ញុំដោយប្រាប់ថាចង់និយាយជាមួយខ្ញុំ ហើយក្លិបប្រាប់ថាចង់លក់ខ្ញុំចេញវិញ។ ថ្នាក់ដឹកនាំក្លិបបានប្រាប់ខ្ញុំថាស្ថានភាពក្លិបមិនសូវល្អ ទើបគ្រប់យ៉ាងវាស្មុគស្មាញហើយវាល្អជាងបើត្រូវលក់ខ្ញុំចេញ។ ខ្ញុំបាននិយាយដដែលៗថាខ្ញុំចង់ស្នាក់នៅបន្តព្រោះក្ដីសុបិនរបស់ខ្ញុំគឺលេងនៅទីនេះនិងរួមចំណែកជួយ Barca ។ ខ្ញុំឆ្លាតណាស់ ខ្ញុំដឹងភ្លាមថាទោះខ្ញុំបដិសេធក៏ពួកគេទាត់ខ្ញុំចោលជាមួយពាក្យសម្ដីល្អៗដែរ។ ខ្ញុំមិនចង់ស្នាក់នៅក្លិបដែលខ្ញុំស្រឡាញ់ទាំងខ្ញុំមានអារម្មណ៍សោកសៅទេ ខ្ញុំដឹងគំនិតរបស់ពួកគេថាគេមិនចង់ឲ្យខ្ញុំនៅបន្ត។ អ៊ីចឹងហើយទើបខ្ញុំព្រមចាកចេញ។
— ខ្សែការពារ Emerson Royal

ប្រភព៖ goal

អានបន្ថែម