និយាយចេញពីចិត្ត! Ronaldo បង្ហើបថាម្នាក់នេះជាគូប្រជែងឆ្នើមបំផុតតាមដែលគេធ្លាប់ជួប

September 6, 2021

អង់គ្លេស៖ កំពូលខ្សែប្រយុទ្ធ Cristiano Ronaldo ជឿជាក់ថារូបគេជាកីឡាករឆ្នើមបំផុតក្នុងលោក ប៉ុន្តែបើនិយាយពីគូប្រជែងល្អបំផុតតាមដែលគេធ្លាប់ជួបគឺ គ្មានអ្នកណាក្រៅពី Lionel Messi នោះឡើយ។

ខ្សែប្រយុទ្ធ Lionel Messi និង Cristiano Ronaldo

លោក Piers Morgan ដែលធ្លាប់សម្ភាសន៍ Ronaldo ផ្ទាល់មាត់ជាអ្នកបង្ហើបឲ្យដឹងថា Ronaldo នៅតែចាត់ទុក Messi ជាគូប្រជែងដ៏ឆ្នើមខណៈដែលអ្នកគាំទ្របាល់ទាត់តែងតែវែកញែកថារវាងគេ និង Messi តើម្នាក់ណាល្អជាង។

ខ្សែប្រយុទ្ធ Cristiano Ronaldo និង Lionel Messi

លោកបានសរសេររៀបរាប់ក្នុង Mail ទន្ទឹមនឹងការវិលត្រឡប់មកទឹកដី Old Trafford របស់ Ronaldo ថា៖

ខ្ញុំបានសួរ Cristiano Ronaldo ថាតើអ្នកណាជាកីឡាករឆ្នើមជាងគេដែលអ្នកធ្លាប់លេងតទល់ជាមួយ? កាលណោះគឺម៉ោង១យប់ដោយមានពន្លឺចេញពីភ្លើងទៀនក្នុងភោជនីយដ្ឋានឯក្រុង Turin នៅឯប្រទេសអ៊ីតាលី ដែលគេនៅលេងឲ្យ Juventus នៅឡើយ។ បន្ទាប់មកគេក៏តបប្រាប់ខ្ញុំថាគឺ Messi ភ្លាមៗនិងមិនស្ទាក់ស្ទើរទេ។ខ្ញុំក៏សួរគេថាពិតមែនឬ? ខ្ញុំពិតជាភ្ញាក់ផ្អើលដែលគេបង្ហើបឈ្មោះគូប្រជែងដ៏ធំបំផុតរបស់គេ។ គេបានតបថា ពិតណាស់ គេ(Messi) ជាកីឡាករល្អបំផុតតាមដែលខ្ញុំធ្លាប់ប្រឈមជាមួយ បន្ទាប់មកគេក៏បានសើចនិងនិយាយថា Piers អ្នកសួរខ្ញុំខុសសំណួរហើយ។ ខ្ញុំក៏សួរបកវិញថា អូ៎ តើគួរសួរសំណួរណាវិញ? គេបានឆ្លើយថា អ្នកគួរតែសួរខ្ញុំថាអ្នកណាគេជាកីឡាករល្អបំផុត។ ខ្ញុំក៏សើចនិងឆ្លើយថា ខ្ញុំដឹងចម្លើយហើយ បន្ទាប់មក Ronaldo បានមិចភ្នែក ខ្ញុំដឹងភ្លាមថាគេជឿជាក់ថាខ្លួនឯងជាកីឡាករល្អបំផុតលើលោក ហើយខ្ញុំយល់ស្របតាមគេ។
— លោក Piers Morgan

ខ្សែប្រយុទ្ធ Cristiano Ronaldo និងលោក Piers Morgan

ប្រភព៖ thesun

អានបន្ថែម